Santiago de Compostela, 3 de febreiro, 2023. – A deputada do BNG, Mercedes Queixa defendeu unha proposición non de lei para reclamar “un Estudo de impacto ambiental conxunto” dos 6 parques proxectados no Monte do Gato. A proposta nacionalista non prosperou polo votos en contra do Partido popular e a abstención do PSdG-PSOE.

Na defensa da iniciativa,  a nacionalista cualificou de “trama” para espoliar o Monte do Gato “publicar despois de dous anos”, seis Declaracións de Impacto ambiental que mesmo confirman a fragmentación dos parques e inciden na falta de rigor e garantías ao que sumou a desprotección das persoas e o territorio .

O Monte do Gato, explicou Queixas, é  o núcleo principal e corazón da Reserva da Biosfera Mariñas Coruñesas e Terras do Mandeo, é “un territorio natural caracterizado por un alto valor  cultural, ambiental, patrimonial e social”.

Nel, encóntrase a maior necrópole megalítica do Neolítico de toda Galiza e unha das máis grandes de Europa; os restos dun monumento BIC, a Torre Teodomiro; unha importante extensión de hectáreas de humidais, as Brañas do Deo, que constitúen unha reserva hídrica fundamental para a comarca, así como un espazo óptimo para asegurar a biodiversidade dun alto valor ecolóxico con especies de flora e fauna protexidas.

Patrimonio social, cultural, natural e medioambiental que, lonxe de ser reforzado na súa protección polo goberno, inexplicabelmente “foi abandonado para facer  un uso forestal descontrolado, provocando a súa degradación por inacción, permitindo plantacións de eucaliptais, “mesmo ilegais”, na Braña de Portomoeiro e sangrado das brañas coa intención de  proxectos empresariais, nalgún momento de tipo inmobiliario”.

O Partido popular, dixo non cumpriu a Directiva Habitat prioritario da UE, e “modificou leis  para  favorecer empresas do oligopolio eléctrico” e agora estamos ante un novo ataque  coa  tramitación de 6 parques eólicos, 3 proxectados por Galenergy e 3 por Greenalia.

Tras dous anos, e  tempo record,  a Xunta publicou 6 Declaracións de Impacto Ambiental sendo 5 favorábeis e 1 desfavorábel. O que non fixeron en 2 anos, recalcou Mercedes Queixas  “conseguírono en 10 días” resolvendo as 6 DÍAS, “sen rigor, nin garantías”. 

Nas propias declaracións de impacto, afirmou “recoñécese que hai un posíbel fraccionamento dos proxectos”. Por outra parte, as DÍAS “non recollen as mostras de patrimonio arqueolóxico e ignoran o valor dos muros de pedra catalogados como Patrimonio da Humanidade, tampouco reflicten a existencia de  varias minas de extracción de mineral  sobre as que a veciñanza tentan  confirmar se existe toxicidade que podería reforzarse cos movementos de terras.

A deputada nacionalista advertiu que a instalación dos parques representa  unha “devastación irreversíbel” que aínda estamos a tempo de frear polo que volveu a reclamar un Estudo de impacto ambiental conxunto dos 6 parques eólicos proxectados no Monte do gato agora que xa está evidenciado nas propias DIAS que se trata dunha fragmentación e denegar  a autorización a estes proxectos que carecen dese estudo imprescindíbel.

Tras a intervención da portavoz popular Díaz Monteira, a deputada do BNG lamentou que unha vez máis o PP goberne para ás eléctricas utilizando “cambios e irregularidades como o fraccionamento ilegal”.

"O PP foi demasiado lonxe elaborando unha lexislación á medida das empresas e cometendo irregularidades que xa anulou a xustiza e que poden incorrer en  responsabilidades penais como a denuncia en curso de ADEGA contra a Xunta por perdoarlle  11,7 millóns a Greenalia, concluíu.