Oza-Cesuras, 1 de abril de 2025. O Bloque Nacionalista Galego manifestou a súa fonda preocupación pola amortización de 7 prazas na RPT do concello que aprobou o último pleno a proposta do goberno local do PP. “Esta decisión podería afectar gravemente a prestación de servizos básicos e á calidade de vida da veciñanza, especialmente a máis vulnerábel, xa que recolle a amortización de prazas de servizo de axuda no fogar ou educadora familiar”, explicou a voceira do BNG, Estefanía Busto.

A proposta, aprobada cos votos do PP, inclúe a redución de traballadoras do Servizo de Atención no Fogar, o que “evidencia unha falta de planificación e un descoñecemento da realidade social do noso concello onde este servizo é cada vez máis importante debido ao avellentamento da poboación. Actualmente este servizo préstase de forma indirecta, mediante unha concesionaria, mais a amortización das prazas afectadas podería limitar a capacidade do Concello para recuperar unha xestión directa do servizo, como tiña o extinto Concello de Cesuras”, sinalou Estefanía Busto, portavoz municipal do BNG. “Recuperar nun futuro a  xestión directa permitiría un uso máis racional dos recursos e garantiría un servizo de maior calidade á veciñanza, ademais que axudaría a resolver os problemas que vén arrastrando este servizo nos últimos anos”.

A este panorama súmase o recente despedimento improcedente recoñecido no xulgado da educadora familiar,  o que “evidencia que o servizo se estaba a prestar” e, por tanto, “deberíase ter incluído na oferta extraordinaria de emprego público para o ano 2022 e manterse na estrutura organizativa actual”.

Sen informe de secretaría nin información do impacto desta supresión de prazas

As nacionalistas lembran que non se presentou ningún informe de Secretaría sobre a carga de traballo nin unha análise económica que xustifique a amortización destas prazas. Ademais, destacan que coa normativa vixente, estabelecese que o informe de Secretaría é preceptivo e vinculante cando afecta á estrutura organizativa do Concello, aos dereitos laborais do persoal ou á prestación de servizos esenciais.

“A falta dese informe de Secretaría é un defecto grave do procedemento administrativo e o goberno do Partido Popular o único que fai é afondar na opacidade á que nos ten acostumadas. Amortizar estas prazas non só prexudica o emprego público, senón que tamén compromete a calidade de servizos fundamentais como o SAF”, denuncia Busto.

O BNG insta ao goberno municipal a desistir desta proposta lesiva para os dereitos da veciñanza e a garantir a continuidade e calidade dos servizos públicos mediante a inclusión das prazas afectadas nas próximas ofertas de emprego público e nesta liña vén de rexistrar alegacións á decisión do Partido Popular.