Aranga, 28 de febreiro. Membros do BNG de Aranga reuníronse hai uns días coa veciñanza da parroquia de Cambás, que solicitou melloras na estrada que une a parroquia con Monfero e denunciou tamén o abandono das pistas deportivas no Toxiño. A veciñanza demandou a recuperación do vello campo da feira no Gallado. O BNG propón que este último espazo albergue a festa gastronómica do Millo de Aranga, o encontro de variedades autóctonas e o encontro de intercambio de sementes autóctonas, paralelas á xa tradicional xuntanza cabalar.

Solicitan melloras na DP-0301

A veciñanza de Cambás trasladou ao BNG a súa preocupación pola da estrada que une a parroquia co concello de Monfero, unhas das vías máis utilizadas de Aranga. Se ben a estrada foi asfaltada nas últimas semanas, as fochancas están á orde do día e o goberno local decidiu conservar unhas lombas de cemento á altura do Carballal que non cumpren a normativa.

“A estrada que une Cambás e Monfero é unha das vías máis transitadas do concello. Porén, esta vía non está ben sinalizada nin ten o trazado máis seguro”, afirma Díaz, que recorda o proxecto do goberno bipartito da Xunta de Galicia para mellorar o trazado desta estrada. “En todos estes anos”, critican os nacionalistas, “o Concello foi incapaz de mellorar o trazado e a estrada está chea de fochancas; é todo un perigo para a circulación.”

“Habería que retirar esas lombas e mellorar a sinalización, con sinais verticais para recordar a velocidade axeitada a cada tramo. Sería un escaso gasto para o Concello, pero gañaríamos moito en seguranza”, argumentou Díaz.

Outras queixas veciñais recaen nas marquesinas utilizadas polos nenos e nenas para esperar o bus escolar, que están cheas de silvas, ou na escasa presenza de contedores para reciclar plástico e vidro, “apenas un par no Toxiño e outro no Gallado, unha cantidade claramente insuficiente e ademais, lonxe das casas”, sinala o portavoz nacionalista que lembra a necesidade de que o Concello garanta servizos en Cambás, como a recollida do lixo.

Aproveitar a pista deportiva e limpar o parque infantil do Toxiño

Denuncian tamén os nacionalistas o estado da pista polideportiva e do parque infantil do Toxiño. O BNG recorda que a pista non está ben asentada e que resulta insegura, polo que reclaman ao Concello que a asegure cun muro de contención. O responsábel nacionalista, Carlos Díaz, afea ao goberno local a falta de mantemento e de uso da pista, que podería ser aproveitada pola poboación de Cambás, “sobre todo a máis nova” e mostra o seu pesar polo desleixo evidente no parque infantil, onde o goberno local non se preocupa nin de baleirar as papeleiras.

“Primeiro gastan os cartos en crear unha infraestrutura e logo non saben que facer con ela. Outro exemplo máis da falta de ideas do goberno local e do escaso interese que ten por dar servizos á nosa xente”, lamentou Díaz, que propón recuperar este espazo e organizar actividades periódicas destinadas á poboación máis nova.

​Actividades no Campo da Feira complementarias da Xuntanza Cabalar

Pero onde maior énfase poñen os nacionalistas é no Campo da Feira do Gallado. O portavoz nacionalista insiste en que a parálise do goberno local se fai evidente na falta de protección da arquitectura popular do campo da feira e critica a falta de impulso e de ideas para Cambás.

“O campo da feira de Cambás está completamente abandonado á súa sorte. Os Postos da Feira están catalogados no PXOM e son un patrimonio dos veciños e veciñas. Regularizaremos a propiedade, para que fique escriturado a nome da parroquia e que sexa a veciñanza a que xestione ese ben común, como fai hoxe coa casa parroquial. O BNG xa amañou a concentración parcelaria na parroquia de Cambás e tamén amañará isto”, afirman Díaz.

“O campo da feira é un patrimonio dos veciños e veciñas de Cambás e fai parte da nosa historia. É ben hora de recuperar ese espazo, coa arquitectura popular que contén, dándolle de novo uso: nós propomos celebrar no campo da feira a festa gastronómica do Millo de Aranga, un encontro de variedades locais, para potenciar a nosa caste de millo, asociado a un encontro de intercambio de sementes autóctonas”.

O grupo nacionalista propón tamén que estas actividades coincidan cun evento singular xa existente, a Xuntanza Cabalar, que desta forma se vería potenciada. O obxectivo é divulgar rutas a cabalo polo concello e aproveitar para difundir o noso gran patrimonio natural, aumentando así os ingresos por turismo na hostalaría local.

Desde o BNG insisten en que se trata de “propostas factibles, con pouco custo pero moi beneficiosas para a parroquia de Cambás e o concello no seu conxunto, porque contribuirán o potencial de Aranga e traerán visitantes, facendo do municipio un lugar máis atractivo se cabe para visitar e xaora, tamén para vivir”, conclúe Díaz.