Coirós, a 14  de xaneiro de 2025. Logo do accidente de tráfico ocorrido a finais da semana pasada, o BNG de Coirós volveu insistir na necesidade de executar o proxecto paralizado sine die polo Estado da rotonda no cruzamento de Queirís.

A voceira nacionalista, Pura Ferreño, ironizaba ao preguntar “cantos accidentes máis teñen que ocorrer para que o Estado considere este punto como de alta sinistralidade e poña, dunha vez por todas, unha solución a un problema que levamos anos padecendo?”.

A formación nacionalista continúa na súa demanda de mellora  da seguranza viaria e mobilidade peonil no Concello de Coirós e en especial no paso da N-VI polo concello. “A demanda para mellorar a seguridade viaria tanto no cruzamento de Queirís,  como en todo o tramo da N-VI ao seu paso polo Concello de Coirós, é unha esixencia histórica tanto das veciñas e veciños de Coirós como por parte do Bloque Nacionalista Galego” lembra a voceira municipal do BNG en Coirós.

“Este último accidente, sumado ao do pasado mes de setembro onde houbo un camión involucrado, ven a constatar a necesidade xa urxente da construción da rotonda”, sinalou Pura Ferreño. “Esperamos que desta vez a nosa proposta sexa tomada en consideración e poida empezar a executarse as obras para mellorar a seguranza nesta vía ao paso por Coirós” conclúe a voceira nacionalista.

Declaración de Queirís como tramo de concentración de accidentes

Para o BNG, o paso da N-VI por Queirís cumpriría coas características para declaralo como tramo de concentración de accidentes, o que facilitaría as actuacións pendentes, cumprindo así co acordo de investidura asinado nesta lexislatura entre o BNG e PSOE.

“O acordo asinado despois das eleccións xerais do ano 2023 recollía o compromiso para a mellora da seguridade con actuacións en todos os tramos de concentracións de accidentes da Rede de Estradas do Estado presentes no noso país”, lembrou Pura Ferreño.