Abegondo, 16 de abril de 2021. O BNG solicitou que o Concello retire todos os refugallos ou vertedoiros incontrolados que hai na contorna do encoro de Cecebre. “Diante das novas que nos últimos tempos están aparecendo a respecto da proliferación de cascallos na contorna do encoro de Abegondo-Cecebre, así como comportamentos de dubidosa ética dentro dun espazo da rede natura como poden ser os  botellóns ou as áreas de descanso con vistas que vimos recentemente nos medios desde o BNG estamos preocupados e solicitamos que o goberno local se preocupe polos espazos naturais”, explicaron desde o BNG.  

“Non deixan de chegarnos imaxes de refugallos de obras na contorna do encoro en Orto, ou verquidos nalgún regato que remata nas augas do pantano e , como non, constantes novas na prensa que se alonxan da imaxe bucólica que nos vende o goberno local. Consideramos que xa que temos a fortuna de contar na nosa contorna cun espazo da rede natura é a obriga das distintas administracións implicadas controlar o uso que facemos do encoro, tamén son estas administracións as responsábeis de coidar a contorna de Cecebre de sensibilizar no respecto polo medio natural, de lembrar que estamos nun espazo que é de todas e de todos que temos a obriga de coidar e de desfrutar”, engadiron.

O BNG de Abegondo cre que o Concello, diante das últimas novas, debe desenvolver unha política máis eficaz no que respecta ao coidado e mantemento deste espazo da rede natura do que as autoridades municipais tanto se gaban. “Non podemos ter como referente ambiental nas nosas terras un espazo que constantemente está a sofrer algún tipo de agresión, xa sexa de tipo natural , paisaxística, social, química…”, indicaron. Por iso desde o BNG solicitaron os Concellos que comparten este espazo de rede natura concorden unha campaña de sensibilización para reducir, na medida do posíbel, comportamentos incívicos.

“Tamén e importante deseñar actividades que fomenten a convivencia co medio natural e o respecto por estes espazos. Actividades que reforcen o coñecemento dos nosos ecosistemas e como debemos coidalos evitando agresións agresións ambientais e ampliar o diálogo entre institucións para que  se aumente o coidado e a vixilancia nos espazos que pertencen á rede natura reducindo, todo o que sexa posíbel, calquera comportamento que atente contra o noso patrimonio natural”, concluíron.