O portavoz de Mobilidade do BNG, Paulo Ríos formulou unha pregunta parlamentaria á conselleira de Infraestruturas e Mobilidade, Ethel Vázquez pola modificación horaria do transporte público, o pasado  5 de outubro, na liña de  autobús Boimorto-Mezonzo-A Coruña que realiza Autos Rico, dentro da UTE Hércules Norte.

O deputado explicou que o  cambio foi trasladado ás persoas  usuarias  a través  duns cartaces nos buses “dous días antes do cambio” provocando un  “caos organizativo” ante   falta de previsión e transparencia que se ven repetindo nestes continuos cambios de horarios e frecuencias.

Paulo Ríos denunciou que na actualidade  “non existe ningún tipo de información de horarios e paradas nas marquesiñas ”como é obrigación das  empresas concesionarias.

Este cambio de horarios, dixo,  provocou as queixas das persoas usuarias, sobre todo no concello de Abegondo, que viñan utilizando esta ruta para desprazarse á Coruña, un horario que non se adapta aos horarios dos centros de ensino ou das empresas obrigándoas  a agardar “case unha hora”.

Cónstanos, dixo o deputado  que este cambio provocou queixas ante a  Consellería de Mobilidade das persoas usuarias e  segundo a información da Xunta se debeu a un axuste de cinco minutos na saída do bus en Boimorto, sen embargo a información que facilitou a empresa concesionaria foi o cambio reponde á  demanda das propias usuarias, engadiu o nacionalista.

A xuízo do deputado, a  esta situación súmase  “á supresión da liña Arzúa-Mesía-A Coruña no novo Plan de Transporte  e as modificacións nas paradas que veñen sufrindo as usuarias e usuarias de Abegondo”.

Poder optar a un servizo de transporte público útil para a veciñanza é fundamental para impulsar unha modalidade de transporte colectivo que repercute positivamente dende o punto de vista económico, social e ambiental e criticou que as   mudanzas e os axustes nos horarios poden beneficiar a uns usuarios e usuarias e prexudicar a outras polo que a Xunta  debe velar por facer  os axustes necesarios co fin de acadar un  servizo máis útil para a veciñanza, valorando o prexuízo que se pode producir nalgún outro punto da ruta e tentando buscar un equilibrio.

“Actualmente atopámonos con que o axuste notificado por Mobilidade non se verifica na realidade, e que  debido a esta mudanza baixou a demanda e o uso desta liña, pasando nalgúns casos de precisar un minibús fronte ao vehículo que se viña utilizando”.

Dende o BNG queremos saber  que van facer para recuperar a normalidade no horario desta liña  no  Concello de Abegondo á hora de utilizar o transporte público por estrada para ir  A Coruña para acudir  ao seu centro de traballo, aulas ou calquera tipo de xestión administrativa ou sanitaria.

Pola súa parte, a conselleira Ethel Vázquez  respondeu ao deputado que  os cambios realizados responden a peticións de  persoas usuarias ao que o deputado  replicou que hai reclamacións no sentido contrario que tamén deben terse en conta á hora de planificar os novos horarios. Ríos lamentou a actitude da conselleira e a súa negativa a tentar buscar un consenso para resolver os prexuízos causados pola modificación horaria do transporte público.