Oza dos Ríos, 13 de xullo de 2015. O BNG-Asembleas Abertas de Oza dos Ríos e Cesuras denunciou que “o PP pretende impedir que desde a oposición poidamos controlar o que fai no Concello”. A voceira das nacionalistas, Estefanía Busto, lamenta que o PP “delega todos os asuntos na xunta de goberno local e impide que asistamos a ela mesmo sen voto e mais pon os plenos e comisións a media mañá para impedir que saibamos que é o que fan cos cartos de todas e todos os veciños.”

“Delegando todo na xunta de goberno local o pleno queda baleiro de contido”, insiste Busto Dopazo, que engade que ademais o PP decidiu celebrar as reunións do pleno e as comisións a media mañá para “dificultar a asistencia das veciñas e veciños e mesmo das persoas que formamos parte da corporación". “Está visto que o alcalde e o PP cren que o Concello é deles, só deles, e que os demais representantes da veciñanza non temos dereito a asistir nin a coñecer que é o que acontece na Casa do Concello”, lamenta Busto.

Neste sentido, recordou que no pasado mandato mesmo se viu obrigada a denunciar ao goberno municipal do PP diante do Valedor do Pobo porque non se convocaban as sesións plenarias ou se deixaban fóra da orde do día as mocións que presentaba o BNG. “Queda claro que pensan que o Concello é o seu cortijo e que poden secuestrar a administración municipal impunemente”, insistiu.

“É unha broma de moi mal gusto que Cacheiro e o PP defendan o soldazo do alcalde falando da súa produtividade cando todos os proxectos e promesas da fusión están aínda por se executar"

Desde O BNG-Asembleas Abertas aseguran que con todas estas medidas do PP “resúltanos bastante complicado poder saber que acontece no Concello para informar á veciñanza do que sucede”.

“A productividade do alcalde é máis cá cuestionábel cando os proxectos da fusión están por verse”

O BNG-Asembleas Abertas cuestionou que o PP decida poñerlle un salario de 45 000 euros ao alcalde. Insisten en que é unha contía “escandalosa” para un concello de 5000 habitantes. “É unha broma de moi mal gusto que Cacheiro e o PP defendan o soldazo do alcalde falando da súa produtividade cando todos os proxectos e promesas da fusión están aínda por se executar", asegurou Busto.

“Está visto que a fusión só serviu para engordar o salario do alcalde, posto que se duplican delegacións especiais nos diferentes termos municipais, isto é que na práctica seguen a funcionar como dous concellos diferenciados" conclúe a voceira nacionalista.