Oza dos Ríos, 13 de febreiro de 2015. O BNG despois de coñecer o auto do Tribunal Superior de Xustiza de Galiza no recurso presentado contra a resolución do proceso de fusión dos concellos de Oza dos Ríos e Cesuras, que presenta unha cuestión de ilegalidade diante do constitucional, anunciou que está estudando presentar alegacións no prazo requirido.

“O que mal empeza mal acaba”, manifestou Estefanía Busto, que acusou ao PP de “forzar a lei facendo interpretacións distintas nos dous concellos para sacar adiante a fusión como fose e as consecuencias vannas pagar as veciñas e veciños”.

“O PP está deixando o Concello de Oza e o de Cesuras e a súa veciñanza nunha situación de inseguridade xurídica e interinidade, que polo que parece vai para longo”, asegurou. “A veciñanza non viu ningunha vantaxe á fusión nin nunca lle pediron opinión en nada e agora ten que ver como o concello se convirte nun esperpento por culpa da teima do PP de sacar adiante unha operación propagandística”.

“Se o Partido Popular fixera o proceso con calma e con todas as garantías e tivera en conta a opinión da veciñanza e da oposición non chegariamos a este punto”

“Se o Partido Popular fixera o proceso con calma e con todas as garantías e tivera en conta a opinión da veciñanza e da oposición non chegariamos a este punto”, asegurou, “pero o  PP tiña moita presa en ser o primeiro nunha carreira que non existe”.

“Agora o alcalde pode poñer todas as pancartas que considere”, criticou, “pero nunha situación como a que provocou o PP o mínimo sería a súa demisión”.