Oza dos Ríos, 2 de decembro de 2014. O BNG cuestionou a recalificación que o goberno local do PP pretende facer dunha parcela en solo rústico para construír un xeriátrico privado.

“No documento que serviu de base á fusión prometían un centro de maiores público no antigo sanatorio de Cesuras, mais agora parece ser que están intentando reactivar o proxecto dunha residencia de maiores privada”, indicou Estefanía Busto, voceira do BNG en Oza dos Ríos. “A verdade é que non nos estraña que incumpran o proxecto de fusión porque xa advertimos no seu momento que era só propaganda, pero é substancialmente distinto unha residencia pública ou privada”.

A voceira nacionalista criticou que “os beneficiados desta operación van ser os propietarios dos terreos que pretenden recalificar, neste caso a empresa Lucus Residencial SL, que van ver como se multiplica o valor deses terreos”.

“O proxecto foi anunciado polo anterior alcalde en 2003, mais polo que sabemos quedou aparcado até a actualidade"

“Xa no ano 2003, hai 11 anos o anterior alcalde anunciara a construción desta residencia privada que ía ser o proxecto máis importante da súa etapa de goberno e xa fora, segundo anunciou, aceptado pola Xunta”, recordou a voceira nacionalista. “Mais a empresa que o ía xestionar, que fora creada o 2 de outubro de 2003, 4 días antes de que o anterior alcalde anunciara que ía xestionar unha residencia no noso Concello. Parece que o Concello e a Xunta foran moi áxiles na xestión do expediente”, ironizou.

Este proxecto polo que sabemos quedou aparcado até a actualidade, “non sabemos se porque a empresa que non tivo actividade ningunha até o momento e está en quebra técnica viu máis beneficios nunha promoción de máis de 90 vivendas en Armea, no Concello de Coirós. Urbanización á que o BNG xa presentou alegacións no seu momento”, explicou Busto.

"Non sabemos se porque a empresa que non tivo actividade ningunha até o momento e está en quebra técnica viu máis beneficios nunha promoción de máis de 90 vivendas en Armea, no Concello de Coirós. Urbanización á que o BNG xa presentou alegacións no seu momento”

“Temos a desconfianza de se está empresa vai verdadeiramente a promover e poñer a funcionar un centro de maiores ou se simplemente promove esta recalificación para enriquecerse coa venta dos permisos e os terreos, xa que unha empresa sen beneficios desde o 2003, que no 2012 se atopaba en situación de quebra técnica, non parece que estea en situación de promover a construción dun edificio de 5000 m2”, engadiu Busto.

Alegacións no periodo de consulta previa

Desde o BNG anunciaron que presentarán alegacións ao proxecto e reclamarán que se someta á avaliación de impacto ambiental. “Trátase dun edificio de dúas plantas de case 5000 m2, na parte máis alta de Porzomillos, aínda que só sexa polo impacto visual entendemos que é necesario que se avalie”, explicou Busto, “iso sen contar coa xestión de residuos e a depuración de fecais”.

O noso Concello enteiro está na Reserva da Biosfera das Terras do Mandeo e a carón do LIC do Mandeo Betanzos, tendo en conta que o PXOM en vigor non se someteu a impacto ambiental porque naquel momento non era necesario, entendemos que calquera proposta de modificación se debera someter a este trámite para minimizar o impacto no noso medio.