Oza dos Ríos, 11 de xullo de 2014. O BNG congratúlase de que por fin se volva a traballar nas obras nas beirarrúas en Salto que levaban meses paradas. “Hai meses que as obras estaban paradas e parece que se reanudaron por fin esta semana despois de que tiveramos que insistir en varios Plenos sobre este tema debido ás molestias que estaban causando aos veciños e veciñas”, indicou Estefanía Busto, portavoz do BNG en Oza dos Ríos.

“A situación en que se encontra a pista é moi deficiente, e viuse agravada coas choivas de semanas atrás”, informou Busto. “Non nos parece de recibo que o goberno local envíe ás casas unha revista pagada con cartos de todos e todas en que se da por rematada unha obra que levaba meses parada. Ademais todos podemos ver que as fotos que  nos envian non teñen nada a ver con como se encontra actualmente esta estrada”.

Busto: “Non nos parece de recibo que o goberno local envíe ás casas unha revista pagada con cartos de todos e todas en que se da por rematada unha obra que levaba meses parada”.

“Actualmente a herba medrou entre a estrada e a beirarrúa, hai anacos de adoquíns rotos e soltos e restos de tuberías o que supón un grave trastorno tanto para os peóns como para os coches que pasan por alí”, indicou a voceira nacionalista.  “As múltiples veces que nos interesamos nos Plenos por esta situación o goberno local non nos deu ningunha explicación razoábel para esta paralización fora de que non poden atender a todo”, indicou Busto, “aínda así parece que por fin se deron conta da situación e esperamos que se conclúan as beirarrúas e solucione a situación antes de volver a publicitalas con cartos dos nosos impostos”.