Oza dos Ríos, 31 de agosto de 2015. O BNG-Asembleas Abertas de Oza dos Ríos e Cesuras trasladou ao pleno do Concello iniciativas para mellorar a seguridade viaria na AC-840 ao seu paso polo lugar de As Tablas. “A estrada AC-840 que percorre o noso concello soporta moito tráfico e frecuentemente se rexistran accidentes” informou a voceira do BNG, Estefanía Busto. “Vimos de recibir queixas por parte dos veciños e veciñas das Tablas, xa que a ausencia medidas de seguridade en moitos tramos fai que resulte perigoso o seu paso a pé”.

“Desde o BNG trasladamos esta situación ao concello e propomos que se coloquen beirarrúas ou sendas peonís paralelas á estrada, que faciliten o paso a pé aos veciños e veciñas das Tablas”, informou Busto.

Desde o BNG trasladamos esta situación ao Concello e propomos que se coloquen beirarrúas ou sendas peonís paralelas á estrada, que faciliten o paso a pé aos veciños e veciñas das Tablas

“A mesma estrada AC-840 divide o concello en dous e en todo o seu percorrido polo Castiñeiro só hai un paso de peóns. Esta situación complícase especialmente no cruce coa estrada da estación” informou a concelleira nacionalista. “É necesaria a colocación dun paso de peóns nesta zona, que facilite o acceso ás veciñas e veciños ao centro de saúde, bancos ou comercios e que regule o tráfico neste cruce”, apuntou Busto.

Prazas de estacionamento para persoas con minusvalía

Desde o BNG-Asembleas Abertas tamén levaron a pleno a necesidade de sinalizar prazas de estacionamento reservadas a persoas con minusvalía. “En todo o concello non hai nin unha soa praza de estacionamento reservada e sinalizada e cremos que son necesarias, cando menos nos núcleos máis habitados”, apuntou a voceira do BNG-AA. “É unha mostra máis do desleixo do goberno local, xa que é unha cuestión ben doada de resolver”, lamentou Busto.