Oza dos Ríos, 23 de decembro de 2013. A portavoz municipal do BNG en Oza dos Ríos, Estefanía Busto, acusou ao alcalde de “amordazar” á oposición. A voceira nacionalista reprochou ao goberno local do PP que, máis unha vez, non permita debater ningunha das propostas que o BNG presentou no Concello.

“O xoves celebrarase un pleno ordinario, mais o alcalde non incluiu na orde do día ningunha das propostas do BNG”, criticou a concelleira nacionalista, “é nos plenos ordinarios cando a oposición podemos levar as nosas propostas, mais con esta actitude ditatorial non nos permiten facer a nosa labor”.

Estefanía Busto: “Como vén sendo tradicional, o PP segue a poñer atrancos á participación da oposición, xa que, cando convocan os plenos ordinarios, non permiten que se debatan as propostas do BNG”

“O alcalde está impedindo que se expresen libremente unha parte das veciñas e veciños que confiaron no BNG para representalos” afirma a concelleira nacionalista. Busto advirte ao alcalde que evitando que a oposición presente iniciativas ao Pleno “non me impide falar a min ou ao BNG, está negándolle o dereito a expresarse a un importante número de veciños de Oza que non pensan como el”.

A portavoz municipal do BNG denuncia que con esta actitude o goberno do PP “atenta contra o dereito dos veciños a participar no Concello”. Nesta ocasión, o BNG tiña rexistrada moción para garantir o subministro eléctrico ás persoas sen recursos, xa que na Galiza hai máis de 650.000 persoas en situación de pobreza e máis de 33.000 fogares sen ningún tipo de ingresos.

“O copagamento farmacéutico, a redución das prestacións por desemprego e a constante suba do recibo luz, fan que cada vez máis familias non poidan facer fronte ao seu pago” afirmou a voceira nacionalista, “a nosa proposta é que ningunha persoa quede sen subministro de gas ou calefacción por non poder pagalo, e moito máis agora que entramos no inverno” reclamou Busto, “polo que se ve, ao PP impórtalle máis colocar aos seus membros nas compañías eléctricas que o benestar das persoas” concluíu Busto.