Estefanía Busto: “Que se aforren cartos non é sinónimo de que se estean a facer ben as cousas, é indicativo de que non se están a prestar servizos básicos como sumidoiros ou traída de augas”.

Oza dos Ríos, 26 de setembro de 2012. A concelleira do BNG de Oza dos Ríos, Estefanía Busto, opúxose no Pleno á proposta do PP para estragar en gasto corrente a cantidade que lle corresponde a Oza do Plan Extraordinario da Deputación DTC 94.

“Que se aforren cartos non é sinónimo de que se estean a facer ben as cousas, é indicativo de que non se están a prestar os servizos básicos que marca a lei como sumidoiros ou traída de augas”, explicou a portavoz do BNG. “Consideramos que a proposta que trouxeron a pleno é un auténtico escándalo”, criticou Busto en relación á proposta da alcaldía, “só destinan 23.000€ a una obra, da que nos informaron no propio pleno”.

“O PP gábase de ter un concello economicamente viábel, con remanente positivo e a pesares disto vanse destinar máis de 146.000€ a gasto corrente”, engadiu a voceira do BNG, “que nos quere decir o alcalde que os veciños e veciñas teñen todos os servizos e por iso non é necesario facer investimentos?”. Busto afirmou pola contra que “hai moitas obras necesarias como os sumidoiros das parroquias que aínda non o teñen ou a limpeza e mantemento dos parques infantís”.

O BNG indicou tamén que o normal sería que se consultara a todos os representantes dos veciños e veciñas. “O PP non ten conciencia das necesidades da veciñanza de Oza, nin interese en tela xa que en ningún momento se nos pediu opinión nin propostas”, engadiu Busto, “obrigándonos así a votar en contra”.

Aprobación da Conta Xeral

No mesmo pleno tamén se votou a aprobación definitiva da Conta Xeral. A este respecto a concelleira nacionalista chamou a atención sobre as dificultades en acceder á documentación “non sei se saben que Negreira ven de ser condenado por isto” dixo Estefanía Busto. O BNG votou en contra explicando que “non é normal ter 68.000€ no banco e os veciños e veciñas sen servizos”.

Convocatoria dos Plenos

“Paréceme moi irregular que se inclúan na orde do día dun pleno extraordinario asuntos propios dun pleno ordinario” afirmou Busto, “a semana pasada debera terse convocado un pleno ordinario, mais non o fixeron” engadiu a portavoz nacionalista.

Os nacionalistas interpelaron ao goberno do PP sobre a forma ilegal de realizar as convocatorias plenarias. “O goberno local xustificou estas prácticas nun aforro para os veciños e veciñas”, conclúe a concelleira do BNG, “pero o custo é o mesmo sexan un pleno ordinario ou extraordinario, a única finalidade é non permitir o debate das propostas da oposición”.