Estefanía Busto: “ Este é o comportamento habitual do alcalde de Oza ocultar información e intentar que a veciñanza non participe nos asuntos do Concello.” “Estamos a favor de que veñan empresas a Oza, pero non cremos que teñan que vir a costa dos intereses dos veciños”.

Oza dos Ríos, 14 de setembro de 2012. O BNG criticou que o goberno local de Oza aprobe a modificación do Plan Xeral, outra vez, a través dun Pleno Extraordinario Urxente. Busto asegura que “non vemos ningún motivo para a extraordinaria urxencia do pleno porque este tema leva enriba da mesa desde o mes de xuño”.

Desde o BNG de Oza explican que o anterior Pleno onde o goberno local presentara a modificación do PXOM en Mondoi xa fora convocado por este mesmo procedemento de urxencia. Ademais a concelleira nacionalista lamentou “a total falta de transparencia do goberno do PP tanto neste asunto como noutros como a fusión, claves para o futuro de Oza”.

“Entendemos que non é de recibo que xustifiquen a urxencia na próxima celebración das eleccións galegas, cando foi o seu propio partido o que decidiu adiantar esta convocatoria”, engadiu a voceira nacionalista, “se eles non coñecían a data de celebración das eleccións non sei quen a coñecía” ironizou.

Neste sentido, a concelleira do BNG recorda que na primeira votación en pleno a modificación do PXOM xa recibiu “un voto crítico” dos nacionalistas porque mantiñan algunhas reservas que a avaliación da Xunta confirmou. “Estamos a favor de que veñan empresas a Oza, pero non cremos que teñan que vir a costa dos intereses dos veciños”, indica Busto.

Ademais, o BNG avoga por “cobrar un canon adecuado sobre este grande consumo de auga” para que o Concello poida asegurar o subministro á poboación de Oza, o mantemento das infraestruturas e a depuración das augas. “Non pode ser que os veciños paguen os pratos rotos polas présas do alcalde”, asegura Estefanía Busto.

Por estes motivos, desde o BNG exixen ao goberno local do PP que aclare “a que veñen tantas présas” neste proceso e reclaman “a máxima transparencia na modificación do PXOM”. Unha transparencia que os nacionalistas entenden que non se dá “convocando un pleno cunhas horas de antelación”.

“Non é a primeira vez que nos vemos obrigados a denunciar publicamente o escurantismo e a falta de respecto ás mínimas formas democraticas do PP no noso concello” advirte Busto, que censura que o PP “habitualmente convoca Plenos extraordinarios, o que impide que poidamos facer propostas e debater sobre as necesidades dos veciños”. “Isto debe ser para o Partido Popular un goberno ‘forte’, aquel que non escoita aos representantes da veciñanza”, criticou a concelleira do BNG.