“Se fai falla unha escola infantil ou un centro de día, que se faga, con fusión ou sen ela”.

Oza dos Ríos, 11 de otubro de 2012. O BNG insistiu esta mañá en que o proxecto de fusión entre Oza e Cesuras non conta co respaldo dos estudos técnicos e económicos necesarios. “Nin sequera o PP ten claro cal é a lei que ten que rexir o proceso”, indicou a voceira do BNG en Oza, Estefanía Busto.

A concelleira nacionalista asegurou que “é necesaria unha consulta popular para que as veciñas e veciños poidan decidir sobre esta fusión acordada polo PP en Santiago”. Busto insistiu en que neste proceso de fusión non se cumpren os requisitos que marca a Lei de Administración Local de Galiza e que “nin sequera temos a documentación que a lei exixe”.

“Non se pode chantaxear aos veciños e veciñas para que dean por boa a fusión en base a promesas electorais sen ningún respaldo orzamentario”, indicou a concelleira do BNG. “Se fai falla unha escola infantil ou un centro de día, que se faga, con fusión ou sen ela”, concluíu.

O candidato do BNG ao Parlamento de Galiza, Henrique del Río, asegurou que o proceso de fusión entre Oza e Cesuras demostra “que o PP non ten un modelo de organización territorial para Galiza”. Segundo o candidato nacionalista, “o PP con Diego Calvo pasou de ser celestina das fusións a defender unha tímida comarcalización e logo desentenderse de todo á vista do escaso respaldo popular da ocorrencia”.

“Galiza precisa soberanía para poder decidir como articular o territorio”, insistiu o nacionalista. “O financiamento e a planta administrativa municipal non pode ser igual na Mancha que en Galiza porque a dispersión da poboación encarece a prestación de servizos”. “O problema é o financiamento municipal, non o número de concellos”, indicou.

O candidato do BNG explicou que os nacionalistas propoñen avanzar na democracia establecendo a obrigatoriedade de consultas populares para casos como este.