Oza dos Ríos, 12 de xuño de 2013. O BNG anunciou que manterá o seu recurso contra o acordo de fusión e o nomeamento da xestora do novo concello “faga a Xunta os cambios que lle dea por facer agora”. Os nacionalistas insisten en que recorrerán tanto a participación dos exalcaldes do PP Lucas e Peón, inhabilitados por sentenza xudicial firme, e o nomeamento da xestora por parte do vicepresidente da Xunta, Alfonso Rueda.

Do mesmo xeito, os nacionalistas manteñen a súa intención de exixir ao vicepresidente do goberno do PP explicacións no Parlamento de Galiza “polo despropósito do golpe de estado institucional que o PP perpetra en Oza e Cesuras para deixar fóra do Concello ao BNG”.

“Se legalmente o BNG se ve nomeado para participar nesta xestora non imos renunciar á nosa responsabilidade coa xente que confiou en nós e deixar por única representación da veciñanza ao PP”.

Os nacionalistas indicaron que non renuncian a darlles voz ás máis de 800 persoas que escolleron ao BNG para representalos nos disoltos Concellos de Oza dos Ríos e Cesuras. “Non podemos deixar a representación destas 800 veciñas e veciños en mans do PP, porque confiaron en nós e non podemos defraudar a súa confianza”, indicou Estefanía Busto, voceira do BNG en Oza. “Se legalmente o BNG se ve nomeado para participar nesta xestora non imos renunciar á nosa responsabilidade coa xente que confiou en nós e deixar por única representación da veciñanza ao PP”, conclúe.