Betanzos, 11 de xuño de 2013.- O BNG denunciou esta mañá o “golpe de estado institucional” que o PP vén de perpetrar en Oza-Cesuras, un golpe de estado que deixa as nacionalistas fóra da xestora. Así o advertía esta mañá en rolda de prensa o responsábel de Organización do BNG, Bieito Lobeira, quen acusou o PP de “excluír a opinión dos que lle molestan, porque non é casual que se exclúa o BNG deste novo concello, malia termos un apoio considerábel”.

O BNG recorrerá e levará ao Parlamento de Galiza a exclusión da formación frontista da xestora

Bieito Lobeira, que estaba acompañado da concelleira do BNG en Oza, Estefanía Busto Dopazo, do responsábel comarcal do BNG, Paulo Carballada, e do responsábel de Política Institucional do BNG nas Mariñas, Henrique del Río, anunciou a presentación dun recurso contra a participación dos concelleiros inhabilitados nas votacións así coma contra o método artellado polo Partido Popular para configurar a xestora. Anunciou, tamén, a presentación dunha iniciativa parlamentar para que o Sr. Rueda dea a cara no Parlamento por este reparto.

Pola súa banda, Estefanía Busto criticou o “secuestro da vontade dos máis de 800 veciños e veciñas que votaron o BNG e que, agora, fican excluídos da xestora”. Tivo críticas para o proceso de fusión de Oza e Cesuras, que cualificou de “fracaso desde o comezo” e reprobou que a fusión se desenvolvera de costas á veciñanza, sen ningunha consulta popular e tombando todas as alegacións.

 Estefanía Busto critica o “secuestro da vontade dos máis de 800 veciños e veciñas que votaron o BNG e que, agora, fican excluídos da xestora”

A continuación, a portavoz do BNG en Oza aludiu ás promesas incumpridas do Partido Popular, ao que lle afeou que non se destinara, desde o Goberno central, nin un só peso para eliminar o talude do tren, que a Xunta desoíra a necesaria demanda da escola infantil e que a Deputación esquecera a discriminación positiva e non investira en Oza os cartos que prometera como “premio” á fusión. Referiuse, tamén, a que Coca Cola non se radicará en Oza e sinalou que de Ence “nada sabemos”.

Tamén criticou a nacionalista que o Partido Popular ocultara, deliberadamente, as inhabilitacións de Julián Lucas e de José Peón, que non poden ser electos nin ocupar cargo público ningún. Paradoxalmente, Peón, advertiu, aparece na xestora malia estar inhabilitado.

Pola súa banda, o responsábel comarcal do BNG, Paulo Carballada, fixo alusión a que a falta de democracia do PP era unha constante en Oza, onde non se lle permitía ao BNG presentar iniciativas. Insistiu Carballada no despropósito desta xestora, “o ridículo do PP chega ao punto de que unha morte ou unha renuncia podería supoñer un cambio de goberno, sen necesidade de participación de tránsfugas”, alertou.

Na mesma liña, o responsábel de Política Institucional das Mariñas, Henrique del Río, acusou o PP de manipular a lexislación para aplicar o que máis lle acaía aos seus intereses en cada caso. Lembrou que en Valadouro o PP esixía unha maioría e que en Oza-Cesuras permite o voto de persoas inhabilitadas. Sinalou que o PP configurou a xestora seguindo criterios electoralistas e saltando a Lei electoral.

Ironizou con que “o PP é tan innovador que aplica un criterio de listas abertas para configurar a xestora, algo que veta a lei actual, e, pola contra, non innova en consultar a veciñanza sobre a fusión, que sería legal”. “É tal o esperpento que o PP se ‘saca da manga’ que o voto foi recibido polas persoas e non as candidaturas que concorreron ás eleccións”, concluíu.