O BNG criticou o despedimento dun terzo da plantilla do concello e o desmantelamento do servizo de promoción de emprego.

Oza dos Ríos, 23 de novembro de 2012. A concelleira do BNG de Oza dos Ríos, Estefanía Busto, informou hoxe de que o BNG votará en contra dos orzamentos municipais de 2012 e 2013 que se debateran no Pleno o vindeiro luns.

“É escandaloso o gasto en atencións protocolarias, propaganda, dietas e transporte neste ano 2012, case 48 000€”, informou a portavoz do BNG. “mentres a maioría da poboación esta padecendo graves recortes o goberno local derrocha unha cantidade indecente de cartos públicos en gastos superfluos, esta é a austeridade do PP en Oza”.

Do orzamento do 2013 destacou que “a proposta da alcaldía supón unha destrución de emprego, amortizando até 11 prazas, un terzo do total de postos de traballo do Concello”. “O alcalde mentiu descaradamente nas súas declaracións aos medios no día de hoxe, non son 4 as prazas que suprimen son 11”, denunciou a concelleira nacionalista, “parécenos vergonzoso que o goberno local do PP gastara case 48 000 euros en cousas como comidas ou transporte e agora digan que temos que axustar despedindo empregados públicos”.

Busto incidiu tamén en que desmantelan todo o que ten a ver coa promoción do emprego. “Desaparecen as partidas para fomento do emprego e isto é especialmente grave nun momento de crise económica terríbel coma o que estamos a vivir. Con 230 veciños e veciñas de Oza no desemprego o alcalde suprime todo investimento para o fomento do emprego e aínda sae na prensa facéndose a vítima porque ten que reducir á metade o seu salario”, criticou Estefanía Busto, “resulta vergonzoso”.

“O único plan de dinamización económica local depende da implantación dunha multinacional e agora vemos os resultados” engadiu a portavoz nacionalista, “resulta que o que venderon a bombo e platillo nos medios de comunicación tradúcese en despedimentos de persoal, en recortes en servizos como o fomento do emprego, cultura ou deportes”.

“Non sabemos onde quedan as promesas de Diego Calvo, cando afirmaba que os traballadores de Oza e Cesuras pasarían a formar parte da plantilla do novo concello”, ironizou Busto, “mentiron naquel momento e seguen mentindo pero agora xa vemos que a fusión non é a solución aos problemas dos veciños e veciñas de Oza”.

“Non sabemos onde quedan os subornos da Deputación” afirmou Estefanía Busto en relción ás supostas vantaxes da fusión. “Estes orzamentos demostran que unha vez finalizado o proceso de fusión, o concello de Oza deixa de interesarlle á Deputación, que de mais de 320 000 euros en transferencias ao Concello de Oza para mercar o visto bo dos veciños á fusión pasan a 20 euros agora que o proceso está a piques de rematar”.