Miño, 8 de abril de 2022.- O BNG de Miño elixe a Alberte G. Nicolás como novo responsábel local. A fronte nacionalista renova o seu Responsábel Local co reto de seguir alargando a base social cara as próximas eleccións municipais de 2023, que encaran co obxectivo de se converter nunha forza determinante.

“Asumimos o reto de seguir alargando a base social do BNG, o reto de achegar o proxecto político da nosa organización e conseguir que nas próximas eleccións municipais de 2023 vexamos reflectido ese traballo en número de votos e acadar representación no Concello de Miño”, salientou Alberte G. Nicolás. 

O novo responsábel da fronte nacionalista en Miño fixou como obxectivo reforzar o contacto a pé de rúa coa veciñanza e os movementos sociais para escoitar as súas demandas e trasladar as propostas do BNG. 

Alberte G. Nicolás arranca este novo período con “moita ilusión e co convencemento de ter un grupo renovado con xente nova e que disposta a traballar para mellorar a vida da veciñanza de Miño” e resaltou “o traballo de toda a militancia e das persoas simpatizantes, porque a forza do BNG está na implicación e no traballo de todas as persoas que formamos parte desta organización”.

“Hoxe somos unha organización local máis unida, máis forte, e cun BNG preparado para traballar en construír unha alternativa política e de goberno tanto en Miño como no País”, asegurou.