Miño, 27 de febreiro de 2022.- O BNG recolleu esta mañá sinaturas no feirón en Miño dentro da súa campaña “Queremos Tren”. Desde o BNG esixen que se reverta o “proceso de desmantelamento da rede ferroviaria galega, que conlevou a supresión de servizos e a eliminación de estacións e apeadeiros e que se viu agravado como efecto da pandemia da covid-19”, afirmaron os nacionalistas. Desde o BNG defendemos unha mobilidade que responda ás necesidades da nosa veciñanza, que una Betanzos cos concellos das Mariñas e coas cidades da Coruña e Ferrol. 

“Pedimos que se execute a modernización do trazado ferroviario entre Ferrol e A Coruña, contemplando a electrificación e dupla vía e construción do bypass de Infesta para favorecer o emprego do ferrocarril en toda a zona urbana A Coruña-Ferrol, acurtando tempos de viaxe entre as dúas cidades e articulando a comunicación entre os diferentes concellos da nosa comarca” engadiron desde o BNG. “Trátase de obras demandadas durante décadas polo BNG e que seguen sen executarse”, criticaron.

“En Miño despois da supresión de frecuencias de tren e de autobús quedamos cun transporte público que non responde ás necesidades das nosas veciñas e veciños. Reclamamos un tren digno e de calidade e que se revisen as concesións de transporte para garantir as frecuencias necesarias”, concluíron.