Miño, 17 de decembro de 2014. O BNG deu a coñecer o contido das alegacións que formulará á modificación puntual do Plan xeral de Miño coa que o goberno local do PP pretende levar adiante a construcción doutra macrourbanización no Monte Piñeiro. Os nacionalistas, que presentarán mañá o documento no rexistro, advirten que a edificabilidade prevista para Monte Piñeiro será o triple que a media prevista no Plan Xeral de Miño.

Neste sentido, cuestionan que a reordenación impulsada polo PP mantén unha edificabilidade esaxerada (0,60m²/m²) e unha densidade de 60 vivendas por hectárea cando o Plan Xeral prevé que sexan do 0,23 e 12,3, respectivamente. “Segundo a proposta de modificación puntual en estudo supón a construción de 750 vivendas no municipio con maior número de vivendas en venda da redonda”, advirten desde o BNG.

A reordenación impulsada polo PP mantén unha edificabilidade esaxerada (0,60m²/m²) e unha densidade de 60 vivendas por hectárea cando o Plan Xeral prevé que sexan do 0,23 e 12,3, respectivamente. Isto vai claramente en contra do que establece a Lei de Costas

“Miño conta con centenares de vivendas en construción paralizadas e un 40% de vivendas baleiras” explican. “Inmobles que non encontran comprador, a pesar de reducir o seu prezo até nun 45% nalgúns casos” aseguran. Segundo denuncian os nacionalistas, “esta ordenación viola a Lei de Costas ao superar o sector de Monte Piñeiro, situado dentro da zona dos 500 metros desde a beira do mar, a media do solo urbanizable do conxunto do PXOM”.

Desde o BNG advirten, ademais, que esta urbanización residencial suporá “un enorme impacto ambiental no monte Piñeiro e mais na marisma do Baxoi e na praia de Miño”. “Non fará falla lembrar que a ría de Betanzos está integrada na Reserva da Biosfera das Mariñas coruñesas e terras do Mandeo”, ironizan os nacionalistas, que recordan que “as marismas do río Baxoi, pola súa riqueza ambiental, están incluídas como zona tampón nesa Reserva e tamén figuran na proposta de ampliación da Rede Natura que o PP mantén paralizada”.

“Co desenvolvemento e a edificabilidade previstas para o Monte Piñeiro enténdese moi ben por que o PP ten paralizada a ampliación da Rede Natura”, ironizan desde o BNG. “Por riba dos intereses xerais, para o PP están os intereses dos promotores inmobiliarios”, censuran.

Segundo a proposta de modificación puntual en estudo supón a construción de 750 vivendas, cando Miño conta con centenares de vivendas en construción paralizadas e un 40% de vivendas baleiras

O BNG considera que “esta urbanización, á vista da porcentaxe de vivenda baleira que ten Miño, é totalmente innecesaria”. “O PP pretende dar un pelotazo no Monte Piñeiro a costa do patrimonio natural de toda a veciñanza”, lamentan. As nacionalistas insisten en que “promover a macrourbanización do monte Piñeiro para pagar os pratos rotos da de Costa Miño Golf como pretende facer o PP non ten nin pés nin cabeza nunha situación como a actual, de crise económica, unha elevadísima taxa de desemprego e co 40% das vivendas do Concello baleiras que non se dan vendido”. “É unha fuxida para adiante do PP que vai levar á veciñanza de Miño ao desastre”, censuran.

Ademais, desde o BNG cuestionan o secretismo con que o goberno local do PP levou adiante este tema. “O PP asegura que remitiu unha enquisa á veciñanza para que opinase sobre o proxecto, pero esqueceu explicar que esa enquisa foi enviada cando se aprobou inicialmente o proxecto antes do estoupido da burbulla inmobiliaria e moito antes de ver as consecuencias que a outra macourbanización, Costa Miño Golf, tivo sobre o noso Concello. Non explicaron o proxecto e que implicacións ten á veciñanza”, sosteñen.

Porén, desde o BNG cuestionan que non se explicase á veciñanza que os ingresos que segundo o PP xenerará esta macrourbanización serán para afrontar “a sentenza que obriga ao Concello a facerse cargo de forma subsidiaria do pagamento do prezo xusto aos expropiados de Costa Miño Golf”. Recordan que “o PP defendeu os intereses de Fadesa en lugar de defender á veciñanza e agora todos temos que pagar os 20 millóns da sentenza máis os dez anos de pleitos que o Concello mantivo coa súa veciñanza para defender á empresa”.

A estes gastos desde o BNG suman o acordo coa coa U.T.E. propietaria de Monte Piñeiro para devolver os tres millóns de euros cobrados como canon urbanístico máis os xuros. “E outras ocorrencias como as beirarrúas multicolor, os farois de 70 000 € e todo tipo de dispendios que fixo o PP cos cartos de todas e todos”, conclúen.