Abegondo, 17 de agosto de 2020.O BNG anunciou que trasladará unha iniciativa ao Parlamento para evitar a supresión das liñas de autobús que unen Mesía e Vila de Cruces coa cidade da Coruña, diante da inactividade do goberno local. O grupo nacionalista reclamará á Consellería de Transporte que evite a desaparición dunhas liñas de autobús que afectaría á veciñanza de Vizoño, Montouto, Figueiroa e Sarandós.

“Se no século XXI o que se busca é unha sociedade máis implicada no medio natural, máis sostíbel , onde se reduza a pegada ecolóxica, onde abandonemos o uso dos transportes privados para pular polo transporte público non ten sentido, deixar sen un medio público de transporte a unha parte importante da zona sur do concello de Abegondo”, indicaron desde o grupo nacionalista.

“Hai case tres semanas que demos traslado desta supresión ao goberno local, que terá lugar o vindeiro mes de setembro, pedíndolle que actuaran e polo de agora non temos constancia de que se producira ningún avance para evitar que estas liñas desaparezan”, explicaron desde o BNG.

Reunión no concello sen avances

Desde o BNG informaron tamén de que foron convocados a unha reunión no concello na que non lles informaron de ningún avance para manter esta liña. “Reunímonos a pasada semana con técnicos municipais e non nos deron ningunha opción nin proposta para manter o servizo, mais alá de que o BNG faga o posíbel e que o goberno de Abegondo está disposto a apoialo”, explicaron os nacionalistas. “O lóxico sería que se o PP que goberna o concello e a Xunta están realmente pola labor de manter o servizo se poñan de acordo e impidan que desapareza a liña, xa que son os que teñen a responsabilidade de gobernar e manter os servizos para a veciñanza”, concluíron.