Betanzos, 19 de novembro de 2015. O BNG presentou as súas emendas aos orzamentos da Xunta para As Mariñas. Desde o BNG insistiron na necesidade de “habilitar unha partida para completar o saneamento da Ría con diferentes praias pechadas ao baño na ría como O Regueiro, O Pedrido e este último verán durante varios periodos no verán tamén a de Gandarío en Bergondo.

“Hai mesmo unha cepa de hepatite C na ponte da autoestrada sobre a ría nos Concellos de Bergondo-Paderne que Xunta e Estado se negan a atallar”, explicou Cristina López, responsábel do BNG das Mariñas, “desde o BNG pedimos que se reserve unha partida para completar o saneamento nos diferentes concellos que verten á Ría de Betanzos. No ano 2015 remataba o prazo para ter saneamento en todos os concellos do País segundo a directiva marco da UE, mais nas Mariñas hai concellos enteiros sen depuración, só con decantadoras como Paderne, e verquidos directamente á Ría en maior ou menor medida en todos os Concellos.

“Pola súa importancia sanitaria e polo seu interese económico para toda a comarca tanto a nivel de marisqueo e pesca como no sector turístico entendemos que é prioritario emprender esta rexeneración. Trátase ademais dun investimento que levamos anos reclamando”, indicou Cristina López.

Desde o grupo do BNG tamén presentaron unha emenda para reclamar a gratuídade do servizo de comedor escolar nos colexios da comarca. “O copago do servizo de comedor escolar e as privatizacións están provocando moitos problemas na nosa comarca. Os nenos e nenas que teñen concedido o servizo de comedor escolar e transporte están obrigados a pagar o comedor xa que non teñen transporte escolar para volver ás súas casas á hora a que finalizan as aulas e polo tanto teñen que facer uso do comedor e pagalo obrigatoriamente xa que non se duplica o horario dos autobuses”, explicou a responsábel nacionalista. “Reclamamos un servizo público de calidade”.

Acondicionamento dos centros de saúde de Bergondo e Oza dos Ríos

“Tanto o Centro de saúde de Oza dos Ríos como o de  Bergondo están nun estado de conservación lamentábel. No caso de Bergondo con goteiras e problemas de humidade e no caso de Oza con problemas tan graves que mesmo chegamos a dubidar da seguridade do edificio. Pensamos que sería precisa unha partida para acometer as reparacións que precisan”, concluíu Cristina López.

Posta en funcionamento do Centro de día de Miño e xeriátrico público no sanatorio de Cesuras

Nas emendas do BNG inclúense tamén partidas para a posta en funcionamento do Centro de día de Miño que leva pechado desde que se rematou a obra no ano 2009 e que contaría con prazas para 30 persoas. “Pedimos 330 mil euros para apertura do Centro xa que a pesar do anuncio do PP na Xunta na precampaña das municipais segue pechado”, indicou a nacionalista.

Desde o BNG, reclamaron tamén a rehabilitación do sanatorio de Cesuras e a súa apertura como xeriátrico público. “É un servizo moi necesario nunha comarca cunha carencia absoluta de prazas”, concluíu.