Betanzos, 28 de setembro de 2014. O BNG exixiu aos rexedores do PSOE de Betanzos e Bergondo “que aclaren de inmediato a súa implicación nos feitos que pon de relevo o sumario da Pokemon sobre enchufes nas concesións da auga en ambos Concellos”. “Por unha cuestión de hixiene democrática, é urxente que alcaldesa e alcalde dean explicacións públicas xa para evitar a sensación de corrupción xeneralizada na nosa comarca”, engadiu o responsábel de política municipal do BNG nas Mariñas, Henrique del Río.

“En lugar de andar ofrecendo denuncias, o que ten que facer a alcaldesa de Bergondo é explicar a súa vinculación con estes mails diante da veciñanza”, engadiu David Carro, do BNG de Bergondo. “Deberan explicarse ou dimitir e non seguir actuando de costas aos veciños e veciñas beneficiando a outros intereses”, abundou. “O PSOE dá moitas leccións pero logo non se acorda daquilo de que ‘a muller do César ademais de ser honrada ten que parecelo’”, ironizan.

“Por unha cuestión de hixiene democrática, é urxente que a alcaldesa de Bergondo e o alcalde de Betanzos, ambos do PSOE, dean explicacións públicas xa para evitar a sensación de corrupción xeneralizada na nosa comarca”

O voceiro do BNG en Betanzos, Henrique del Río, recordou que Viaqua-Aquagest “tan só pagará este ano ao Concello, segundo cifras do PSOE, 3500 euros pola xestión do servizo de subministro de auga e 300 euros polo servizo de saneamento”. “Obras, bombeos e mesmo o local para que faga negocio pagámolo toda a veciñanza a cambio de que, polo que se desprende do sumario, o PSOE faga clientelismo ofrecendo postos de traballo aos amigos”, denuncian os nacionalistas. “Os cartos de todas e todos non se poden usar para facer amiguismo”, advirte Del Río.

O PSOE dá moitas leccións pero logo non se acorda daquilo de que ‘a muller do César ademais de ser honrada ten que parecelo'

Os nacionalistas recordan que en Betanzos propuxeron a remunicipalización dos servizos básicos. “No caso da auga hai 2 meses que levamos o tema ao Pleno e nada de nada, xa se ve o interese que teñen no tema desde o goberno local” denuncia o edil nacionalista. “Remunicipalizar a auga sería a maneira de dar un servizo mellor para a veciñanza, máis económico e evitar estas corruptelas” engade.

Desde o BNG recordan que a traída e o saneamento teñen “prezos cada vez máis caros e servizos cada vez peores porque o goberno consinte e colabora en que a empresa manteña a súa marxe de beneficios por riba de calquera outra consideración”. “O goberno local non fai nada para obrigar a estas empresas a dar un servizo de calidade porque están máis preocupados en atender outros intereses, vender favores e facer clientelismo cos cartos de todas e todos a costa dos servizos públicos”, denuncian ambos representantes nacionalistas.