Betanzos, 21 de novembro de 2014. O BNG fixo público que non participará na Camiñata en contra da violencia machista convocada polo Consorcio das Mariñas. “Parécenos dunha hipocrisía tremenda que o Partido Popular convoque unha camiñata coincidindo co Día Internacional contra a violencia machista, mentres leva anos recortando nos fondos para igualdade e para loita contra a violencia”, explicou Vitoria Louro, responsábel de acción feminista do BNG na Comarca da Coruña.

“O PP no goberno do estado recortou un 45% os orzamentos en igualdade entre os orzamentos dos anos 2013 e 2014”, indicou Louro, “o orzamento destinado a previr a violencia contra as mulleres reduciuse un 30% desde que o PP chegou a presidencia do goberno. E con estes datos convocan camiñatas como se iso fose a ser solución para os problemas das mulleres”.

“Na proposta de orzamentos para o ano 2015, propoñen aumentar as partidas para loita contra a violencia machista un 6.8% despois de recortalas nun 30%”, criticou a responsábel do BNG. “Estas camiñatas un día no ano son simplemente un intento do PP de lavarse a cara diante das mulleres. Contra a violencia machista hai que comprometerse todo o ano non simplemente cunha foto o día 25 de novembro”.

“Un paseo un domingo non fai nada para evitar que sigan asesinando mulleres”

“As cifras dos orzamentos da Xunta amosan tamén significativas caídas das partidas destinadas a políticas de igualdade e de conciliación familiar. Nun primeiro caso, desde 2009 os recursos para igualdade pasou de 31 a 5,8 millóns de euros e o programa de conciliación familiar cae de 5,2 a 1,2 millóns de euros”, indicou Vitoria Louro. “Esta política do PP está dificultando na práctica a posibilidade das mulleres de separarse do seu agresor nun contexto de crise económica como a que vivimos a dependencia económica imposibilita na práctica as denuncias”.

“O PP aposta por unha sociedade segregada, perpetuando roles, financiando aos centros que segregan por sexos. Fronte ao recorte en igualdade e conciliación familiar, medran os gastos en altos cargos e persoal de gabinete, dos departamentos de dirección, asesoramento xurídico”, indicou Louro.

Críticas ao goberno local de Betanzos

“O PSOE que coorganiza desde o goberno local de Betanzos esta camiñata e que participa nas decisións do consorcio das Mariñas está avalando estas políticas do Partido Popular”, indicou Henrique del Río, portavoz do BNG en Betanzos.

“O goberno do PSOE en Betanzos negouse durante estes 3 anos e medio, a pesar da proposta do BNG, a que se habilitara unha liña de axudas específica para asociacións que traballan a prol da igualdade e contra a violencia machista”, criticou.

“O PSOE desde o concello de Betanzos non dedicou nun só euro no seu orzamento á loita contra a violencia machista”

Ademais, no orzamento municipal que aprobaron este ano non aparece un só euro para loita contra a violencia machista nin para levar á práctica o Plan de igualdade - que aprobaron o 8 de marzo de hai tres anos, como medida publicitaria polo día da muller- . O BNG presentou unha emenda a este orzamento reclamando unha partida para este fin, mais o goberno local negouse a debatela e a incorporala”, explicou Del Río.

“Con estas actuacións o PP e o PSOE póñense de acordo para facerse unha foto o Día Internacional contra a violencia machista mentres o resto do ano se esquecen deste tema e abandonan ás mulleres que están sufrindo os seus recortes o resto do ano”, explicou.

Ningún avance na loita contra a violencia machista

“O documento que nos propoñen asinar e exactamente o mesmo palabra por palabra que propuxeron o ano pasado. A proposta consiste en asinar o mesmo pacto social que o ano pasado polo que vemos e as medidas concretas tamén son exactamente as mesmas xa que o texto e o mesmo palabra por palabra”, criticou Vitoria Louro, “e vergoñenta a deixadez e falta de compromiso con que tratan un tema tan grave coma este”.

“Era evidente que un pacto local que se reduce a unha declaración formal e unha serie de campañas publicitarias e estudos, así como unha andaina anual contra a violencia coincidindo co día 25 de novembro, non ían modificar en nada a situación das mulleres”, indicou a voceira nacionalista,”mais parécenos vergoñento que non modificaran unha soa coma nin introduzan ningunha avaliación das campañas publicitarias emprendidas”.

“Un autocolante de adhesión para o consorcio, concellos, centros educativos, asociacións, centros de saúde, empresas e sindicatos vai facer tanto pola protección das vítimas e pola igualdade real como un valo publicitario por modificar a pirámide demográfica do Concello onde o presidente do Consorcio é alcalde”, concluíron desde o BNG.