Bergondo, 19 de febreiro de 2015. O BNG de Bergondo reclama ao Concello que contacte cos propietarios da antiga vivenda que ocupaba o parroco de Guísamo para que de inmediato procedan ao acondicionamento da mesma así como da parcela na que esta situada a mesma. “Descoñecemos se é propiedade da igrexa católica ou quen é o propietario, mais o goberno local ten formas de contactar cos propietarios e solucionar este problema para a veciñanza de Guisamo”, explicou David Carro do BNG de Bergondo.

“A vivenda é unha construción moi antiga que logo do falecemento do anterior párroco quedou deshabitada e se xa antes tiña claros síntomas dun galopante deterioro dende aquelas este acrecentouse”, indicou Carro. "A carón desta vivenda situase unha área recreativa moi frecuentada polos veciños e veciñas xa que a mesma conta con pista polideportiva, parque infantil e parque biosaudábel. Tanto a vivenda como a parcela están nunhas condicións lamentables polo que o Concello debería tomar as medidas oportunas para garantir a seguridade nesta zona tan concorrida antes que teñamos que lamentarnos" indicou David Carro.

O entorno atopase nun estado lamentable pese a ser un área recreativa frecuentada por maiores e crianzas

A vivenda ten perigo de derrubo, de feito xa lle falta a parte central da cuberta polo que dende o BNG consideramos que se debería garantir a seguridade da veciñanza que por alí transita, cando menos, valando a construción e sinalizando o perigo, ou no seu defecto, que os propietarios fagan unha restauración das partes máis susceptibles de caer”, informou.

“A parcela esta chea de maleza por completo, sendo un considerable foco infeccioso pola presenza de ratos e outros animais de gran tamaño polo que compre que sexa acondicionada de inmediato, xa que tamén sería fácil que se puidese producir algún incendio, e na zona existen outras vivendas moi próximas”, engadiu.