O PP vota en contra da alegación do BNG ao orzamento para 2014 para rebaixar o salario do alcalde

O PP vota en contra da alegación do BNG ao orzamento para 2014 para rebaixar o salario do alcalde

Estefanía Busto, portavoz do BNG en Oza dos Ríos

Oza dos Ríos, 26 de decembro de 2013. No Pleno ordinario celebrado  esta mañá, o PP votou en contra das alegacións do BNG ao Orzamento para 2014. O BNG tamén cuestionou o incremento do salario de González Cacheiro, que ascende até os 56 084 euros brutos ao ano, “o presidente anunciou nun programa de televisión que ía renunciar á suba do salario, mais hoxe o PP aprobou definitivamente os orzamentos e non contemplan a baixada salarial”, afirmou Busto. “A isto hai que engadirlle os 11 760 euros ao ano para unha media dedicación, o que fai un total de 67 984 euros ao ano só en dous salarios”, engadiu a concelleira nacionalista. “Xa vemos a produtividade do alcalde, hoxe nin sequera asistiu ao pleno” ironizou.

“Os gastos de órganos de goberno non quedan aí: 13 000 euros para atencións protocolarias, 11 000 para locomoción e 38 240 para dietas dos órganos de goberno, o que resulta un total de 130 084 euros destinados a gastos de órganos de goberno” engadiu a voceira nacionalista. “Parécenos como mínimo insultante que se destinen estes cartos á gastos de órganos de goberno mentres hai parroquias que non teñen cubertos os servizos básicos como o subministro de auga potábel ou o saneamento, mais vese que o PP pensa antes nos seus propios intereses que no benestar da veciñanza” concluíu Busto.

“Parécenos insultante que se destinen 130 084 euros á gastos de órganos de goberno mentres hai parroquias que non teñen cubertos os servizos básicos como o subministro de auga potábel ou o saneamento, mais vese que o PP pensa antes nos seus propios intereses que no benestar da veciñanza”

A portavoz nacionalista, Estefanía Busto puxo en cuestión unha vez máis a transparencia da alcaldía “a estrutura interna dos documentos, con partidas xenéricas fan que, na práctica, se permita que os cartos públicos se gasten en calquera cousa, non necesariamente na prevista no orzamento”, explicou a portavoz do BNG Estefanía Busto, “é imposíbel que poidamos saber realmente en que se gastan os cartos de todos e todas”.

Moción para garantir o subministro eléctrico a persoas sen recursos

O BNG levou ao pleno unha moción para demandar a Xunta e Concello que soliciten diante do goberno do estado os cambios lexislativos necesarios para garantir o subministro enerxético ás familias que estean en situación de pobreza e, entre tanto, adopte medidas prácticas para evitar as dramáticas consecuencias desta problemática nos fogares galegos máis desfavorecidos. “Vímonos obrigados a presentar esta moción polo trámite de urxencia, xa que o PP se negou a incluíla na orde do día”, informou Busto, “a moción aprobouse por unanimidade, supoñemos que ao non estar o alcalde o PP non tiña claro que votar, xa que noutros concellos da comarca se negaron a aprobar esta proposta”.

“Os recortes do PP en servizos públicos e a redución nas prestacións por desemprego e o encarecemento do recibo da luz fan que cada vez máis persoas sen prestacións e sen emprego poidan facer fronte ao seu pagamento, situación que se agrava no inverno”, explicou Busto, “o que reclamamos é que ningunha persoa quede sen subministro eléctrico”.

O PP vota en contra da alegación do BNG ao orzamento para 2014 para rebaixar o salario do alcalde