Bergondo, 2 de xaneiro de 2014. O BNG denunciou o deterioro do edificio de Bos que ata hai uns anos acolleu o laboratorio lácteo LIGAL. Os nacionalistas advirten de que “o edificio padece un deterioro moi evidente” e critican que coa súa “pasividade” a Xunta esté consentindo que o inmoble, construído con cartos públicos, se esté estragando.

Desde o BNG critican que o PP votase en contra de destinar 200 000 euros nos orzamentos da Xunta para este 2014 para rehabilitar o edificio e convertilo nun viveiro de empresas. Os nacionalistas presentaron esta alegación aos orzamentos da Xunta tras ver a boa acollida que a súa proposta recibiu hai meses entre os empresarios do concello debido á proximidade deste inmoble ao polígono industrial.

O BNG propuxo que o PP destinase 200 000 euros dos orzamentos da Xunta, para evitar o mais que evidente deterioro deste edificio público

“É un estrago permitir que o edificio se vaia arruinando pouco a pouco en lugar de invertir nel unha cantidade modesta e que volva a prestar servizos á veciñanza”, advirten os nacionalistas. “Canto máis tempo pase no actual estado de abandono, máis cartos farán falla logo para amañalo”, insisten.

O uso do edificio para sede do consorcio contradí a reforma da Lei Local

“O PP aproba unha lei local que persigue desmantelar os consorcios de concellos pero o PP desde o Consorcio reclama máis edificios públicos, é un sensentido”

Os nacionalistas critican, ademais, que o Consorcio das Mariñas, por medio do seu presidente e alcalde de Abegondo do PP, reclame á Xunta o edificio. “O PP aproba unha lei local que persigue desmantelar os consorcios de concellos pero o PP desde o Consorcio reclama máis edificios públicos, é un sensentido”, indican, “no Partido Popular teñen que definir cal é o modelo que pensan aplicar na ordenación do territorio porque a modificación da lei local, vai na liña completamente oposta”.