O BNG pide medidas concretas para paliar a alarmante subida do desemprego na comarca

O BNG pide medidas concretas para paliar a alarmante subida do desemprego na comarca

Betanzos, 7 de febreiro de 2014. O BNG demandou unha “aposta decidida” da Xunta e o Concello para atallar as “alarmantes cifras de desemprego” na localidade. O voceiro nacionalista, Henrique del Río, explicou que “hai 21 persoas máis sen emprego desde xaneiro”, o que sitúa a cifra total en 1206 persoas sen emprego. “Isto sen contar as que xa nin sequera se anotan no paro e as que marcharon a buscarse a vida na emigración”, engade.

A dicir do BNG, tanto a Xunta como o goberno local deberían buscar alternativas para que toda esta xente atope emprego en lugar de “anunciar plans e cursos que nunca chegan” e que “provocan aínda máis frustración e malestar na xente”.

Para os nacionalistas, “a destrución de emprego na comarca das Mariñas está traspasando un umbral perigoso”. Advirten de que en Miño o desemprego medrou un 7,63% con 38 novas persoas sen emprego. “As bondades da fusión de Oza e Cesuras volven a quedar en evidencia logo de que ambos municipios disparasen o paro nun 7% con respecto ao mes anterior”, advirten os nacionalistas.

“A práctica totalidade das persoas que pasaron a estar sen emprego en xaneiro en Betanzos son mulleres; o desemprego feminino medra alarmantemente”

“O PP fártase de vender brotes verdes pero nesta comarca o paro avanza de media un 2,32%” censuran desde o BNG. “Miño é o caso máis alarmante, pero o PP está máis preocupado en sacar adiante a súa segunda macrourbanización ruinosa que en atender os verdadeiros problemas da veciñanza”, censura Henrique Abraira, voceiro do BNG na localidade.

Desde o BNG lamentan que o PP desde o goberno galego volvese a abandonar sectores estratéxicos para o desenvolvemento económico da comarca e a creación de emprego. “O PP volveu a impedir que se destinen fondos este ano para rexenerar a ría para desenvolver actividades pesqueiras e recreativas”, recorda Del Río.

O PP votou en contra das iniciativas que o BNG presentou no Parlamento sen ter alternativas

Igualmente, censuran que os conservadores se negasen a destinar os fondos necesarios para garantir a rehabilitación do Casco Histórico de Betanzos, un dos principais activos culturais e turísticos da comarca. “O PP fai moitas declaracións retóricas, pero á hora da verdade a Xunta evita gastar un euro na posta en valor do Casco”, lamentan. Desde o BNG consideran que os deputados e deputadas do PP na comarca “votaron contra os intereses da súa propia veciñanza” ao tumbar as emendas que os nacionalistas presentaron aos orzamentos da Xunta.

Alarmante avance do desemprego feminino

“A práctica totalidade das persoas que pasaron a estar sen emprego en xaneiro en Betanzos son mulleres”, advirte Del Río. Os nacionalistas aseguran que o número de mulleres sen emprego na bisbarra está “medrando alarmantemente”.

Para atallar esta situación o BNG demandou no Parlamento 149 000 euros para un plan de emprendemento feminino e un millón para programas de inserción laboral específicos para mozas. “O PP votou en contra destas iniciativas porque nos eu modelo de sociedade a muller queda relegada ao fogar, para criar os fillos e atender a casa”, denuncian.

O BNG pide medidas concretas para paliar a alarmante subida do desemprego na comarca