Oza dos Ríos, 5 de decembro de 2013. O BNG preguntou no pleno como se ía efectuar a baixada de salario do alcalde, “xa que entendemos que o lugar para é o pleno do concello e non un plató de televisión, é unha falta de respecto para a veciñanza e para a corporación”, explicou Estefanía Busto, portavoz do BNG en Oza dos Ríos.

“As duras críticas que recibiu o popular González Cacheiro fixeron que só uns días despois de aprobarse inicialmente o orzamento para o exercicio de 2014 anunciara nun programa de televisión que renunciaba á subida” recorda a voceira nacionalista. “Pensa vostede renunciar a suba do salario como anunciou e que salario vai cobrar?”, interpelou Busto. A nacionalista tamén pediu que o goberno do PP explicase “como vai modificar as bases de execución do orzamento tendo en conta que votou a favor do mesmo e non pode, legalmente, presentar alegacións”.

“O alcalde non deu resposta a ningunha destas preguntas, limitouse a criticar á oposición, chegando a perder as formas e mesmo faltando ao respecto” informou Busto. “Malia a baixada do salario, as partidas destinadas a gastos de órganos de goberno parécennos excesivas, desde o BNG mantemos a mesma postura e informamos á veciñanza, que aclare cal vai ser o gasto en dedicacións”, engadiu a portavoz nacionalista.

Estefanía Busto: “Entendemos que o lugar para é o pleno do concello e non un plató de televisión, é unha falta de respecto para a veciñanza e para a Corporación”

Os nacionalistas tamén se interesaron polo estado da auga en Cesuras, despois de saberse que  nalgunhas parroquias non é apta para o consumo “non nos parece de recibo que se lles cobren as taxas por un servizo que non se lles presta” apuntou Busto, “isto supón un problema de sanidade, mais o PP prefire investir o POS en asfaltar camiños e en gasto corrente no canto de solucionar os problemas reais das veciñas e veciños” concluíu a concelleira nacionalista.