O BNG lamenta o "circo" en que convertiron o Concello os diferentes grupos políticos da Corporación

O BNG lamenta o "circo" en que convertiron o Concello os diferentes grupos políticos da Corporación

davidBergondo, 13 de febreiro de 2014. O BNG criticou o “bochornoso espectáculo” en que o goberno do PSOE e a oposición de PP, VB e non adscritos convertiron o Concello. “Parece que o último en que pensan os concelleiros e concelleiras de Bergondo é na veciñanza, están máis atentos a zouparse entre eles”, lamentou David Carro.

Os nacionalistas aseguran que “o goberno do PSOE vive fóra da realidade” por pretender aprobar un orzamento que destina 27 000 euros a protocolo e propaganda. “A comelladas, viaxes ao Marineda City e bombo de todo o que non fan pagándoo a costa da veciñanza”, engadiu Carro.

Desde o BNG consideran “excesivo” o gasto en salarios e dietas de goberno de máis de 111 000 euros. “Non nos estrana que o PSOE estea lanzado a aprobar as contas pola porta de atrás”, engade.

“Parece que o último en que pensan os concelleiros e concelleiras de Bergondo é na veciñanza, están máis atentos a zouparse entre eles”

“Bergondo lidera a estatística de desemprego nas Mariñas e o PSOE prevé destinar a políticas de fomento do emprego tan só 15 000 euros”, advirte o nacionalista. “Pola contra, prevé fundir este 2014 uns 36 500 euros en festas”, indica. “É unha maneira un tanto irresponsábel de queimar os cartos de todas e todos no concello con máis paro da comarca”, insisten.

Desde o BNG tamén cuestionan os 72 500 euros que o executivo do PSOE pretende repartir “a dedo” entre “as entidades e colectivos que ao PSOE lle peta por motivos que non aclara”. Así, aseguran que o executivo local tan só prevé 12 800 euros para repartir nunha convocatoria pública á que poidan concorrer todas as asociacións en igualdade de oportunidades. “Cos cartos de toda a veciñanza o PSOE pretende facer electoralismo en lugar de atender as verdadeiras necesidades de Bergondo”, advirten. Entre estes cartos repartidos a dedo, figuran 5000 euros para o Arcebispado. “Debe ser que non lles abonda cos cartos que reciben do Estado e con que non paguen a contribución polas fincas da Igrexa”, ironizan.

“O PSOE vive fóra da realidade ao querer gastar 27 000 euros en protocolo e propaganda, é dicir, en comelladas, viaxes ao Marineda City e bombo de todo o que non fan”.

Os nacionalistas cuestionan que o PSOE elaborase os orzamentos sen contar coa opinión da veciñanza. “Un orzamento elaborado de xeito participativo é moito máis transparente, a xente sabe en que se gasta”, explican. “É obvio que iso é precisamente o que quere evitar o PSOE forzando até a ilegalidade a nova lei de réxime local”.

“O que xa non entendemos é que o PSOE de Bergondo turre con aprobar as contas na xunta de goberno precisamente o mesmo día en que o exministro Caamaño anuncia o recurso do PSOE contra a nova lei local”, engadiu. “Como en outras moitas cousas, queda claro que o PSOE ten dous discursos en función de se ten que gobernar ou facer oposición”, asegura Carro.

“Toda a preocupación do goberno do PSOE parece que é facerlle tragar á oposición coas súas contas, nunha actitude déspota”, lamentan desde o BNG. “E parece que tanto a PP como a VB ou aos non adscritos o único que lles preocupa é zurrarlle ao PSOE en lugar de tratar de chegar a acordos polo ben da veciñanza de Bergondo”, concluíu.

O BNG lamenta o "circo" en que convertiron o Concello os diferentes grupos políticos da Corporación