Betanzos, 11 de febreiro de 2014. O BNG presentou esta mañá en Betanzos a campaña social que desenvolve en defensa do dereito ao aborto. A responsábel de acción feminista do BNG das Mariñas, Estefanía Busto, asegurou que “con esta campaña pretendemos informar e concienciar á sociedade sobre o retroceso que a reforma do PP supón nos dereitos das mulleres”.

“Con esta lei do PP vai decidir sobre o corpo da muller xuíces, médicos, curas ou o propio estado, todo o mundo menos a propia muller”, denunciou a voceira do BNG en Oza. “O PP pretende que as mulleres volvamos ao rol tradicional de nais e coidadoras suplindo así os servizos que pretenden recurtar”, asegurou. “Non me estrana que digan que esta lei é boa para combatir o desemprego, pretenden expulsarnos dun prumazo a todas as mulleres do mercado laboral” denuncia.

A presentación, que contou coa presenza do responsábel comarcal do BNG, Paulo Carballada, e a responsábel comarcal de acción feminista, Vitoria Louro, tivo lugar na estación de ferrocarril Betanzos-Cidade. “A elección deste lugar simboliza que viaxar a outro estado para pór fin a un embarazo non desexado vai ser unha poucas alternativas que lle queden ás mulleres galegas”, indicou Busto Dopazo.

“Con esta lei do PP vai decidir sobre o corpo da muller xuíces, médicos, curas ou o propio estado, todo o mundo menos a propia muller, pretende que volva ao papel de nai e coidadora”

“A outra alternativa é a volta ás prácticas clandestinas que comprometen gravemente a propia vida da muller”, explicou. “O aborto é un dereito e este debe garantirse nas mellores condicións sanitarias e realizado por profesionais, cousa que só garante a sanidade pública”, engadiu. “Por este motivo estamos a desenvolver esta campaña nas rúas e nas institucións”, abundou.

“O pasado mes de maio presentamos nos concellos unha moción para que se levase adiante unha campaña explicando á veciñanza como afecta a reforma da lei do aborto”, indicou Henrique del Río, responsábel de Política institucional do BNG das Mariñas. “En Betanzos aprobouse, mais o goberno do PSOE, a pesar de respaldar a nosa moción, negouse a informar ás veciñas sobre como pretende furtarlles o dereito a decidir sobre o propio corpo o goberno do PP”, explicou o tamén voceiro do BNG en Betanzos.

“O Pleno tamén acordou o pasado mes, co voto do PSOE e a iniciativa nosa, colocar no balcón do Concello unha pancarta co lema ‘polo dereito das mulleres a decidir. Aborto libre e gratuíto”, indicou. “Deben estar bordándoa a man os concelleiros e concelleiras do PSOE porque van máis de 15 días para facelo”, ironizou.

“É unha vergoña a actitude do PSOE en Betanzos” asegurou. “Presentan ao Pleno declaracións en defensa do dereito ao aborto que non están dispostos a defender pública e socialmente para facer unha mera pose”, denunciou. “Xa é moita hora de que pasen da palabrería aos feitos, porque en Betanzos néganse a dar a cara por un dereito esencial para as mulleres e logo vanse a Madrid a facer ver que son máis ‘progres’ que ninguén”, asegurou.