Oza dos Ríos, 14 de xaneiro de 2014. O BNG de Oza dos Ríos criticou que “ o PP no o Ministerio de Facenda non cré na fusión de concellos que o PP na Xunta e na Deputación vende como solución a todos os problemas do rural galego”.

“O concello resultante da fusión de Oza dos Ríos e Cesuras ía recibir segundo o PP máis ingresos do Estado”, explicou Busto, “este era o principal dos beneficios que contemplaba o proxecto da fusión”.  “Mais, agora resulta que para o Ministerio de facenda seguen sendo dous concellos independentes, polo que a participación nos ingresos do estado seguirá sendo a mesma e non vai haber os incrementos que se aplican en función do número de habitantes”, indicou a voceira nacionalista.

“Imos encadeando mentira tras mentira coa fusión, a veciñanza aínda non veu ningún dos beneficios que o PP se cansou de prometer” afirmou a concelleira nacionalista, “nin a Deputación, nin a Xunta nin o Estado ‘premiaron’ esta fusión, a veciñanza aínda non percibiu ningunha vantaxe, até o de agora o único beneficiado foi o alcalde que triplicou o seu salario”, engadiu Busto.

Estefanía Busto: “Imos encadeando mentira tras mentira coa fusión, a veciñanza aínda non veu ningún dos beneficios que o PP se cansou de prometer”

“O que deberían facer no PP é poñerse de acordo, xa que están afirmando unha cousa aquí e o seu contrario en Madrid” afirmou a voceira nacionalista. “A Xunta de Feijoo e a Deputación de Calvo preséntanse como pioneiros e auguran máis fusións, mais polo que se ve, os seus compañeiros de partido en Madrid non opinan o mesmo”, reclamou, “antes de facer experimentos terán que definir que modelo territorial queren implantar”.