Miño, 5 de setembro de 2013. O BNG critica que o goberno local do PP pretenda pagar os pratos rotos da macrourbanización de Costa Miño Golf con outra macrourbanización no Monte Piñeiro. “O PP de Miño vive totalmente fora da realidade se pensa que van conseguir cartos vendendo pisos na actual situación económica”, criticaron desde o BNG, “pretenden executar a toda velocidade unha macrourbanización que non ten ningún sentido xa que hai miles de vivendas baleiras en Costa Miño Golf”.

“Esta debe ser a forma ‘imaxinativa’ coa que o alcalde pretende facer fronte ao pago de 21 millóns de euros aos afectados polas expropiacións de Costa Miño Golf”, ironizaron os nacionalistas. O BNG considera que o que está demostrando o Partido Popular en Miño “é que o importante é favorecer ás promotoras e non defender os intereses da veciñanza”.

“Esta debe ser a forma ‘imaxinativa’ coa que o alcalde pretende facer fronte ao pago de 21 millóns de euros aos afectados polas expropiacións de Costa Miño Golf”

Os nacionalistas recordaron que o BNG xa levou unha proposición non de lei ao Parlamento Galego en xaneiro de 2011 para “intentar paralizar esta barbaridade”. Monte Piñeiro está situada nas inmediacions da Praia Grande e a peaxe que dá acceso ao areal, a unha distancia de 400 metros da praia. Esta urbanización vai "afectar gravemente a zonas naturais protexidas e a áreas marisqueiras", indicaron os nacionalistas.

Desde o BNG de Miño informaron que a urbanización de Monte Piñeiro contempla unha densidade de edificación tres veces superior á de Fadesa Costa Miño Golf “que á vista está o grande negocio que supuxo para o concello de Miño”, ironizan.

O goberno municipal xa pactou unha indemnización coa empresa á que se lle adxudicara a urbanización, polo tempo que estivo paralizada “de 3 millóns de euros mais xuros, ademais de acordar que sería o propio concello o que leve a cabo a urbanización do terreo”.

“Parécenos delirante que o PP anuncie que se van saltar os prazos legais para ‘colar’ esta nova aberración urbanística como sexa antes da entrada en vigor do POL”, concluiron.