Oza dos Ríos, 2 de outubro de 2013. O BNG fixo público esta mañá que o Tribunal Superior de Xustiza de Galiza admitiu a trámite o seu recurso contra a fusión entre Oza dos Ríos e Cesuras.

“O noso recurso foi admitido a trámite e partir de agora a Consellería de Presidencia ten un prazo de 20 días hábiles para achegar o expediente da fusión”, explicou Henrique del Río, responsábel de acción institucional do BNG das Mariñas. “Unha vez rematado este prazo, teremos outros 20 días hábiles para presentar as nosas alegacións á tramitación do expediente de fusión”.

Os nacionalistas anunciaron que presentarán varias alegacións a este proceso. “Con independencia de que no expediente poidan aparecer outras irregularidades, hai irregularidades que xa hai tempo que vimos anunciando”, explicou a portavoz do BNG de Oza dos Ríos, Estefanía Busto.

“En primeiro lugar, nunca estiveron claras as maiorías que se teñen que aplicar neste proceso. Aplican segundo lles convén a Lei de Administración Local de Galiza ou a Lei de Bases”, indicou a voceira do BNG. “Ademais, como xa criticamos no seu momento, nestas votacións participaron concelleiros que están inhabilitados para exercicio de cargo público, como o ex alcalde de Oza dos Ríos e o ex alcalde de Cesuras”.

Desde o BNG, indican tamén que todo o proceso se levou a cabo de xeito escurantista sen informar de nada á veciñanza nin aos propios membros das Corporacións e en base a un proxecto    que non contiña un estudo claro das consecuencias da fusión.

“Nos orzamentos do Estado non hai unha soa partida para o noso concello, malia ter prometido o PP o soterramento da vía do tren ao seu paso polo centro de Oza”

Estefanía Busto, insistiu en que “o nomeamento da xestora así como o seu funcionamento segue a ser unha incógnita para nós”. “Este nomeamento está repleto de irregularidades e como consecuencia o resultado no respecta a vontade da veciñanza dos dous concellos”, criticou, “o BNG foi excluído desta xestora malia representar a preto de 800 veciños e veciñas en Oza dos Ríos e Cesuras”.

Os orzamentos do Estado non contemplan partida ningunha para o novo concello fusionado

“O presidente da xestora e propio Partido Popular prometeron soterrar a vía do tren ao seu paso polo centro de Oza dos Ríos”, informou Busto, “sen embargo, nos orzamentos do Estado non se contempla partida ningunha para o noso concello. Non sabemos con que cartos pensan levar a cabo esta obra”, ironizou

A voceira do BNG sinalou que “hai tempo que vimos advertindo de que a fusión estaba asentada sobre promesas infundadas e polo que parece a realidade danos a razón”.