Miño, 5 de xullo de 2013. O BNG calificou hoxe de “medida desesperada do PP para non facerse responsábel das consecuencias das súas políticas” o recurso do goberno local de Miño ante o Tribunal Supremo. Segundo os nacionalistas, o recurso do goberno do PP é para evitar pagar aos expropiados pola urbanización Miño Costa Golf os 21 millóns de euros que o TSXG valorou que lles corresponden en xustiza polos seus terreos.

Segundo o BNG os veciños e veciñas afectados polas expropiacións van ser os principais prexudicados por esta manobra desesperada do Partido Popular “xa que levan mais de 10 anos agardando para cobrar o que legalmente lles corresponde”, insistiron.

“Grazas ao PP Miño é un negocio redondo para os especuladores e ninguén se fai responsábel das consecuencias para a xente”, advirten desde o BNG. Os nacionalistas insisten na súa exixencia de que o goberno municipal do PP dimita en pleno e “que deixen de gastar os cartos da veciñanza en recursos para non asumir a ruína en que meteron o Concello”.

“Grazas ao PP Miño é un negocio redondo para os especuladores e ninguén se fai responsábel das consecuencias para a xente”

Á sentenza que condena ao municipio a asumir os 21 millóns de euros das expropiacións de Fadesa ven de se lle sumar outra penalización pola que a Xunta deberá pagar 200.000 euros de indemnización á constructora que ía facer a obra de ampliación do porto “que era a súa grande promesa nas municipais”. “Nin no Concello nin na Xunta o PP asume as consecuencias dos seus feitos por máis que lles custe miles de euros á veciñanza”, censuran.

O BNG explicará o seu parecer nun acto público

O BNG está a desenvolver unha campaña informativa nas Mariñas dentro da campaña nacional “non é unha crise é un roubo”. Os nacionalistas consideran que “Miño é o exemplo perfecto do espolio da crise e das políticas do PP: políticas contra o pobo e gobernos en favor dos especuladores”. Aseguran que “os culpábeis da crise que está levando a pobreza ou á emigración como única saída á maioría” como demostra a historia de Costa Miño Golf.

O BNG anuncia unha campaña informativa para a veciñanza e un acto en Miño como exemplo do urbanismo do PP

Dentro desta campaña, o BNG celebrará un acto público o vindeiro día 11 desde as 20:00 h no local social da rúa, coa presenza de Ana Pontón, deputada no Parlamento de Galiza, e Henrique Abraira, do BNG de Miño. “Miño pasou de ser ‘un paraíso por construír’, aínda que sería máis ben un paraíso para os especuladores e agora convertiuse nun ‘pesadelo do que espertar’”, ironizou Abraira.