Bergondo, 30 de xaneiro de 2014. O BNG cuestionou que o PSOE de Bergondo pretenda aprobar un orzamento municipal valéndose “dunha treta de dubidosa legalidade”. Para os nacionalistas esta tentativa do PSOE ven demostrar “o cinismo e a hipocrisía do PSOE”. “Opóñense á lei de reforma local nas Cortes, anuncian un recurso ante o Constitucional e mesmo traen a Pleno unha moción para derrogala no noso concello e despois unha alcaldesa incapaz de sentarse a falar e negociar nin coa oposición nin coa veciñanza, eméndalle a plana á súa propia liña para manterse no poder custe o que custe”, conclúen, “parécenos totalmente incoherente posicionarte en contra dunha lei e despois estar desexando aplicala para aprobar o orzamento sen contar con ninguén”.

Os nacionalistas cuestionan que o PSOE elaborase os orzamentos sen contar coa opinión da veciñanza. “Un orzamento elaborado de xeito participativo é moito máis transparente, a xente sabe en que se gasta”, explican. “É obvio que iso é precisamente o que quere evitar o PSOE forzando até a ilegalidade a nova lei de réxime local”.

Para o BNG, as contas que o PSOE pretende aprobar na xunta de goberno son “antisociais” e “están completamente fóra da realidade”. “O PSOE de Bergondo pretende aprobar un orzamento no que dedica 27 000 euros a gastos de protocolo e propaganda”, censuran. “Non nos estrana que queiran aprobar as contas pola porta de atrás, xa que prevén repartirse máis de 111 000 euros en salarios e dietas dos órganos de goberno”, censurou o nacionalista David Carro.

“Bergondo lidera a estatística de desemprego nas Mariñas e o PSOE prevé destinar a políticas de fomento do emprego tan só 15 000 euros”, advirte o nacionalista. “Pola contra, prevé fundir este 2014 uns 36 500 euros en festas”, indica. “É unha maneira un tanto irresponsábel de queimar os cartos de todas e todos no concello con máis paro da comarca”, insisten.

Vendo este orzamento e a hipocrisía do PSOE disposto a ser o primeiro en facer uso dunha lei que teñen recorrida no Constitucional entendemos perfectamente a desconfianza da veciñanza que non ve que o Concello intente solucionarlle ningún problema

Desde o BNG tamén cuestionan os 72 500 euros que o executivo do PSOE pretende repartir “a dedo” entre “as entidades e colectivos que ao PSOE lle peta por motivos que non aclara”. Así, aseguran que o executivo local tan só prevé 12 800 euros para repartir nunha convocatoria pública á que poidan concorrer todas as asociacións en igualdade de oportunidades. “Cos cartos de toda a veciñanza o PSOE pretende facer electoralismo en lugar de atender as verdadeiras necesidades de Bergondo”, advirten. Entre estes cartos repartidos a dedo, figuran 5000 euros para o Arcebispado. “Debe ser que non lles abonda cos cartos que reciben do Estado e con que non paguen a contribución polas fincas da Igrexa”, ironizan.

“É normal que queiran aprobar estas contas a porta pechada e sen que ninguén se entere”, ironiza Carro, “vendo este orzamento e a hipocrisía do PSOE disposto a ser o primeiro en facer uso dunha lei que teñen recorrida no Constitucional entendemos perfectamente a desconfianza da veciñanza que non ve que o Concello intente solucionarlle ningún problema”.