Miño, 1 de agosto de 2024.- O BNG de Miño volveu poñer o foco no servizo de transporte municipal, o autobús que conecta as diferentes parroquias co centro de saúde, no que se rexistraron novas incidencias.

“Desde o mes de xuño o servizo volveu mostrar signos de deterioro, hai días que non se prestou o servizo, tendo que recorrer a taxis porque o autobús non realiza a súa ruta e hoxe vemos como houbo paradas das que ten programadas que o autobús non fixo”, sinalou o voceiro do BNG, Alberte G. Nicolás. “Temos un servizo precario, que non conecta dunha maneira eficiente aos diferentes núcleos do noso concello como levamos tempo denunciando”, engadiu.

Para as nacionalistas, é necesario explorar alternativas que conecten “a todo o mundo e en horarios flexíbeis” antes de renovar o servizo actual “por inercia”. “Cabe lembrar que hai un ano presentamos unha proposta para estudar a creación dun “Coche de Punto” que saia de rutas ríxidas e que poida ter horarios máis amplos”, sinalou o voceiro nacionalista. 

“En definitiva, trataríase dun modelo de mobilidade a demanda con recollida no domicilio, garantindo os principios de accesibilidade e universalidade, e adaptada ás necesidades da veciñanza dun xeito máis racional e sustentábel”, reiterou.