Miño, 24 de xuño de 2014. O BNG criticou a tarifa a ORA aprobada por PSOE e PP. “Xa dixemos no seu día que non estabamos de acordo con cobrar por estacionar na praia pero ao vermos a ordenanza concreta parécenos escandaloso”, indicou Henrique Abraira, do BNG de Miño.

“Cobrarlle á xente catro euros por aparcar, sexan cinco minutos ou doce horas, parécenos moi inxusto”, explicou. Ademais, cuestionan que paguen exactamente o mesmo unha persoa que estea no desemprego e un multimillonario. “Isto nos tempos que corren non ten defensa posíbel”, engade.

“Non ten pés nin cabeza pagar o mesmo por aparcar 4 minutos que por aparcar 12 horas, nin que pague o mesmo unha persoa desempregada que un multimillonario”

“Cobrarlle dez euros á veciñanza de Miño por unha tarxeta de residentes que non dá dereito a estacionamento reservado para residentes é un escándalo”, abunda. Os nacionalistas aseguran que, á vista das tarifas establecidas na ordenanza aprobada por PSOE e PP, preténdese “exprimir a veciñanza e visitantes para tapar o furado da condena polas expropiacións de FADESA”. “E iso se ven alguén este verán á praia, porque co recheo que lle están facendo perderá boa parte do seu atractivo”, ironiza Abraira.

Desde o BNG reclaman ao goberno local do PP que expliquen, ademais, “de onde saíu a concesionaria deste estacionamento da que fala hoxe a prensa”. Os nacionalistas recordan que o goberno do PP asegurou que ía ser xestionada directamente polo Concello e “non nos consta ningún concurso para privatizar este estacionamento”. “Despois vemos todos os días escándalos relacionados con determinados servizos como o da ORA nos concellos da comarca”, engade Abraira.

“Os nacionalistas exixiron unha tarxeta especial para persoas desempregadas e aparcamentos reservados para a veciñanza”

Por todos estes motivos, os nacionalistas reclamaron que se se vai implantar a ORA na praia, do que estamos en contra, polo menos se busquen vías para facer esta medida máis xusta. “Parécenos que o mínimo sería que non se lles cobrase as persoas desempregadas, o que podería facerse a través dunha tarxeta especial acreditando a condición de desempregado ou que se reserven aparcamentos para residentes”.

“Non entendemos onde está a mellora se agora todos imos ter que pagar por algo que tiñamos de balde”, conclúe Abraira.