Oza dos Ríos, 19 de xaneiro de 2021. O BNG de Oza-Cesuras votará en contra da conta xeral do ano 2019 no Pleno que se celebrará mañá. As nacionalistas criticaron que se incumpriran todos os prazos que marca a lexislación para a súa aprobación. “Segundo establece a lei, a conta xeral deberá ser sometida a informe da Comisión Especial de Contas antes do día 1 de xuño, mais no nosos concello celebrouse en novembro”, explicou Estefanía Busto, concelleira do BNG. 

Desde o BNG cuestionan tamén o elevado gasto en órganos de goberno, “ademais dos 73.000 de salarios, gastaron en dietas 33.000, 13.000 euros máis do previsto, e a isto aínda que sumarlle 11.000 en atención protocolarias” expuxo Busto, “son unhas cifras escandalosas para un concello que apenas sobrepasa os 5000 habitantes, e máis tendo en conta as especiais circunstancias deste ano”, sinalou a concelleira nacionalista

“Por outra banda, non se realizan investimentos, o goberno tiña un total de 3.276.146 euros para investir e deixaron sen gastar 1.467. 537, e dicir, case o 45% do que podían investir quedou sen gastar” explicou Busto. “Por exemplo, da partida para pavimentación de vías públicas quedou sen gastar a metade, o que demostra que o problema do noso concello non é a falta de fondos, senón a mala xestión, o alcalde anda constantemente a pedir premios pola fusión, mais despois non sabe que facer cos cartos”, ironizou Busto