Bergondo, 18 de novembro de 2015. O BNG-Asembleas Abertas reclamoulle ao goberno local que explique á veciñanza de Guísamo o proxecto de recalificación da “Casa de Cortés”, no centro da localidade.

“Non entendemos a falta de transparencia nun asunto coma este, do que todo o que soubemos foi a través dos medios de comunicación e supoñemos que se o oculta será porque sabe que se trata dun negocio ruinoso para os veciños e veciñas”, indicou David Carro, “o que realmente supón e a recalificación de  solo dotacional para construír unha urbanización privada”.

Os nacionalistas explican que a finca coñecida como “Casa de Cortés” esta cualificada como solo dotacional escolar-deportivo nas normas subsidiarias. “Coa desculpa de que se trata dunha cooperativa de vivenda o PSOE pretende dar un ‘pelotazo’ no centro de Guísamo, eliminando máis de dez mil metros cadrados de solo dotacional para un colexio ou un parque público e meter no seu sitio unha urbanización” denuncian.

A finca coñecida como “Casa de Cortés” esta cualificada como solo dotacional escolar-deportivo nas normas subsidiarias

“É un pelotazo disfrazado de iniciativa social” denuncian. “Todo canto recibe o Concello a cambio de aprobar esta recalificación é un centro social na casona de indianos que ten a finca” advirten desde o BNG-AA. “Unha recalificación feita a media de alguén para facer outra urbanización, cando ademais dubidamos de que Bergondo precise construír vivenda nova e máis ben o que se necesita en lugares como Guísamo son servizos públicos”, indicou o voceiro nacionalista.

O BNG-AA demanda protexer o inmoble e as árbores centenarias da finca

Os nacionalistas explicaron que a Casa de Cortés non está protexida patrimonialmente pola normativa do Concello. “En 2002 modificáronse as normas subsidiarias para levar para esta parcela o solo dotacional para un colexio, mais non se corrixiu a falta de protección desta casona de indianos”, indican desde o BNG-AA.

“Coa desculpa de que se trata dunha cooperativa de vivenda o PSOE pretende dar un ‘pelotazo’ no centro de Guísamo, eliminando máis de dez mil metros cadrados de solo dotacional para un colexio ou un parque público e meter no seu sitio unha urbanización”

Por este motivo, os nacionalistas demandan tamén ao goberno local a protección da arquitectura singular desta casona e da casa de servizo anexa. Do mesmo xeito, piden que se protexan igualmente varios exemplares de árbores de grande porte, entre elas unha araucaria e varias palmeiras canarias que poderían mesmo sobrepasar o século. “O planeamento permite usar como zonas libres este solo de equipamentos mentres non se constrúen os equipamentos, así que en canto o Concello se faga con esta finca cumprindo coas normas subsidiarias pedimos que o acondicione como parque para goce da veciñanza”, conclúe Carro, “sería estupendo que o goberno local gardara unha partida no orzamento para 2016 do que nada sabemos para este fin”, concluíu.