A eurodeputada Ana Miranda levará ao Parlamento Europeo o saneamento da Ría de Betanzos

Ana Miranda na visita á praia do Regueiro
Ana Miranda na visita á praia do Regueiro

A eurodeputada do BNG, Ana Miranda, visitou este venres a praia do Regueiro e a zona do Pedrido, no marco do percorrido que está realizando polas diferentes comarcas galegas co fin de trasladar as súas problemáticas ao Parlamento Europeo

A eurodeputada Ana Miranda levará ao Parlamento Europeo o saneamento da Ría de Betanzos

Betanzos, 24 de agosto de 2018.- A eurodeputada do BNG, Ana Miranda, visitou este venres a praia do Regueiro e a zona do Pedrido, no marco do percorrido que está realizando polas diferentes comarcas galegas co fin de trasladar as súas problemáticas ao Parlamento Europeo.

“Para o BNG a calidade das nosas augas é unha prioridade, posto que dela dependen unha parte importante dos sectores produtivos galegos”, afirmou a eurodeputada nacionalista en referencia á pesca e o marisqueo, pero tamén ao turismo. Nese sentido considerou que é urxente a instalación dunha depuradora no concello de Paderne, xa que isto afecta á zona do Pedrido, unha zona moi importante de marisqueo.

Precisamente no Pedrido hai dous bancos marisqueiros do Plan de explotación da confraria de Miño. Trátase de dúas zonas de marisqueo de zona C provisional, as que están peor de toda a ría, mentres que o resto é zona B. Esta situación provoca unha evidente perda de emprego, como se mostra no feito de que a confraría de Miño ten actualmente 19 mariscadoras, mentres que no ano 2002 tiña 42.

“A mala calidade da auga e a obriga de enviar o marisco a zona de reinstalación na parte externa da Ria de Ferrol, impide que medre a actividade extractiva”, sinala ao respecto Ana Miranda, polo que defende a urxente instalación dunha depuradora. Neste sentido o BNG lembra que no ano 2012 a Xunta fixera a promesa de investimento de máis de 2 millóns de euros para esta depuradora, pero nunca chegou a aparecer nos orzamentos.

Para a eurodeputada do Bloque é lamentable que o PP sempre vote en contra das emendas do BNG aos orzamentos da Xunta reclamando cartos para o saneamento integral da Ría. De feito, o BNG  presentou o ano pasado unha iniciativa nos concellos e no Parlamento pedindo a creación dunha mesa da Ría con colectivos sociais, confrarías, grupos políticos e concellos para facer un seguimento da situación da auga da Ría e un cronograma de actuacións para levar a cabo solucións. Estas iniciativas aprobáronse nos Plenos dos concellos nos que o Bloque ten representación pero sen ten consecuencias prácticas.

Nesta mesma liña, Ana Miranda visitou asemade a praia do Regueiro, pechada ao baño desde o ano 2016 e que está fóra das analíticas de zonas de baño da Xunta pola contaminación da auga por bacterias fecais, despois de 5 anos con resultados por enriba do máximo de contaminación para permitir o baño.

Homenaxe a Antolín Faraldo

Asemade, a eurodeputada do BNG participou na homenaxe a Antolín Faraldo, xornalista e político nacido en Betanzos. Este acto, presentado por Vanessa Rey e coa intervención do portavoz do BNG en Betanzos, Henrique del Río, contou tamén coa actuación musical de Alvaro Muras e Mari ah!, así como unha representación teatral da asociación cultural Abril de Lume e Ferro.