Bergondo, a 18 de novembro de 2019. O BNG de Bergondo ven de rexistrar as súas propostas para a elaboración do orzamento municipal 2020. ''O Goberno Local sempre nos culpabiliza do retraso do orzamento por presentar alegacións, pese a que eles mesmos o presentan fora de prazo; este ano decidimos achegarlles antes as nosas propostas, así acabáronselles as escusas" explicou o portavoz do BNG David Carro. 

''Dende o BNG presentamos oito propostas concretas para que o Goberno Local teña en conta, entre elas, salientar a inclusión dunha partida para a adquisición de terreos para novas infraestruturas ou a ampliación das existentes (CPI, nova escola infantil, centro de día, ...)'' indicou Carro. '' Ademais, solicitamos aumentar as partidas para cultura e deporte, tanto as axudas a asociacións ou clubs, como a realización de actividades do propio Concello'' engadiu o concelleiro nacionalista. 

Outras propostas detalladas polo BNG son a realización dun Plan de Igualdade, ampliar a inversión en fomento do emprego, estudiar a posible remunicipalización de servizos, ou limitar as subvencións nominativas 'a dedo'. 

Para cubrir as partidas que aumentan, os nacionalistas bergondeses propoñen rebaixar as dedicadas a publicidade e propaganda, gastos protocolarios, ou festexos. 

Ademais, o BNG demanda do Goberno Local unha profunda reflexión sobre as condicións para a presentación de propostas dentro do proceso de Orzamentos Participativos, "co sistema de 10.000€ por parroquia algunhas non presentan propostas e noutras ningunha é viable, co cal quedaran sen a inversión" indicou Carro, "as condicións impostas polo equipo de goberno dificultan a aceptación de propostas que poidan entrar no proceso, sobre todo o importe establecido e a circunscrición por parroquia" concluíu o voceiro do BNG.